भांगरभूंय | प्रतिनिधी
म्हापशें: राज्यांत बेकायदेशीरपणान रावपी दोगां नायजेरीयन नागरिकांक म्हापशें पुलिसांनी अटक केली. ऊचे जस्टिन ओनूग्ब (४३) आनी ओलिस आगुस्तिन ओकाफोर (३८) अशीं तांचीं नांवां. ते पेडण्यां बिराडाक रावताले.
दुबावीत ओलीस ओकाफोर हाका बिरेस्तारा जाल्यार ऊचे ओनूग्ब हाका शुक्रारा म्हापशें शारांत भोंवतना पुलिसांनी अटक केली. व्हिसाची मुदत सोंपले उपरांतूय दुबावीत आरोपी गोंयां सयत भारतांत बेकायदेशीरपणान रावताले.
दोगांय दुबावितां कडेन भारतांत रावपाचीं गरजेचीं कागपत्रां नाशिल्लीं. हाका लागून पुलिसांनी तांकां देशी विदेशी पारपत्र कायदो आनी नेम मोडिल्ल्याच्या आरोपा खाला गुन्यांव नोंद करून अटक केली.
मजगतीं, गोंयच्या भायल्या पुलिसांनी हालींच्या काळांत गोंयां कडेन संबंद आशिल्ल्या वा गोंयांत रावपी विदेशी नागरिकांक ड्रग्स तस्करी प्रकरणांत अटक केल्या. हे फाटभूंयेर राज्य पुलिसांनी गोंयांत बेकायदेशीर रावपी आनी ड्रग्स तस्करी कडेन संबंदीत नायजेरीयन नागरीकां सयत हेर विदेशी नागरिकां आड अटक मोहीम राबयल्या. हे मोहिमे प्रमाण वयल्या दोगांकूय पुलिसांनी अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
