भांगरभूंय | प्रतिनिधी
पणजी : कर्मचारी भरती आयोगा वरवीं भरती जावपी एलडीसी आनी ज्युनियर स्टेनोग्राफर पदां खातीर जांकां टायपींग करप शक्य ना, अशा प्रकारच्या दिव्यांगांक टायपींग चाचणींतल्यान सूट दिली. हे खातीर पात्र आशिल्ल्या दिव्यांगांनी १५ जुलय २०२५ मेरेन कर्मचारी भरती आयोगाकडेन वैजकी मंडळ वा सीवील सर्जना कडेन प्रमाणपत्र सादर करप बंधनकारक आसा.
कर्मचारी भरती आयोगान २१ नोव्हेंबर २०२४ दिसा एलडीसी आनी ज्युनियर स्टेनोग्राफर पदां खातीर जायरात दिल्ली. ह्या पदां खातीर सीबीटी परीक्षा जावन निकालूय जाहीर जाल्यात. फकत कुशळटाय चांचणी जावपाचें उरलां. कांय दिव्यांगांक टायपींग करप शक्य जायना. जांकां टायपींग करप शक्य नासता, तांकांच ही सूट मेळटली. जांकां आयकूंक येना वा वेवस्थीत दिसना, त्या दिव्यांगांक सूट मेळची ना, अशें आयोगान स्पश्ट केलें. टायपींग चाचणी सोडून हेर पात्रतायेंत कसलेच तरेची सूट मेळची ना. कुशळटाय/ टायपींग चाचणी पयलीं हें प्रमाणपत्र १५ जुलय मेरेन सादर करचें पडटलें.
एलडीसी आनी स्टेनोग्राफर पदांच्या स्कील टेस्ट खातीर आयोगाने पात्र उमेदवारांची वळेरी जाहीर केल्या. ही वळेरी कर्मचारी भरती आयोगाचे वेबसायटीचेर उपलब्ध आसा. स्कील टेस्टची (कुशळटाय चाचणी) तारीख आजूनय जारी जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
