कला राखण मांडाचें बांदकाम खात्या आड सुपारी आंदोलन

भांगरभूंय | प्रतिनिधी

पणजीः कला अकादमीचे इमारती विशीं कागदपत्रां दिवपा खातीर बांदकाम खातें टाळाटाळ करता. तशेंच कला अकादमीच्या बांदकामाचें आॅडीट करपा विशीं अजून कसलेंच स्पश्टीकरण ना. मुख्यमंत्री प्रमोद सावंत हांणी निर्देश दिवन लेगीत खातें कागदपत्रां दिवपाक कळाव करता, असो गंभीर आरोप कला राखण मांडच्या वावुरप्यांनी केला.
कला अकादमी विशीं कला राखण मांडचे कलाकारांनी आल्तिन बांदकाम खात्याच्या मुख्यालयांत सुपारी आंदोलन केलें. ह्या वेळार कलाकारांनी खात्याचे प्रधान मुखेल अभियंते उत्तम पार्सेकार हांकां घेराव घालो.
टास्क फोर्सा वांगडा जाल्ले पयले बसकेंत आमी बांदकाम खात्या कडल्यान कांय डॉक्युमेंट मागिल्ले. मात ते अजून मेरेन दिवंक नाशिल्ल्या कारणान आमी हें सुपारी आंदोलन घडोवन हाडलें. आंदोलना उपरांत हे डॉक्युमेंट दिवपाचें आमकां आश्वासन दिलां, अशें कला राखण मांडचे निमंत्रक देविदास आमोणकार हांणी सांगलें.
टास्क फोर्साक अजून मेरेन डॉक्युमेंट दिवंकना म्हण आमी मुख्यमंत्र्याची भेट घेतिल्ली आनी भेटी वेळार आमी कला अकादमीच्या बांदकामाची आॅडीट करपाची मागणी केल्ली, अशें फ्रान्सिस कोएल्हो हांणी सांगलें.
बसकेंत अधिकार्‍यांनी सांगलें, तांणी स्ट्रक्चरल ओडीट करपाक सांगलां. मात अजून मेरेन अहवाल येवंक ना. आतां आंदोलन केले उपरांत हे विशींची आमकां म्हायती मेळ्ळी की आमी आॅक्टोबरान आॅडीट करपाक सांगिल्लें. मात तांणी आयआयटी चेन्नय हांकां आॅडीट करपाचे निर्देश मार्चांत दिल्यात. मुख्यमंत्र्याचे जाल्ले बसकेत आमकां डॉक्युमेंट दिवपाक सांगिल्लें. मात ४५ दीस मायज जाले, अजून मेरेन आमकां डॉक्युमेंट दिवंक ना. तांकां हे विशींच कसल्योच हालचाली करपाच्यो नात, असो आरोप फ्रान्सिस कोएल्हो हांणी केलो.
कला अकादमीच्या वर्गाची वण्टी सावंड प्रुफ नात. जे भुरगे व्हायोलीन शिकतात तांच्या वर्गांत पियानोचो आवाज येता, अशी कागाळ सेसील राॅड्रीग्स हांणी केली.
आमी कला अकादमीच वचून एका संगीत शिक्षकेक पियानो वाजोवपाक सांगले तेन्ना आवाज वर्गातल्या भायर येवपांक लागलो. वर्गातले एसी लेगीत मोडल्यात. कला अकादमीच्या अवतिकायेंक लागून कलाकारा, लोक, विद्यार्थी आनी शिक्षक त्रास काडटात. हे वर्गांक येवन एकदा तरी भेट दिवपाची आमी मागणी पार्सेकारा हांका विनंती केल्या, अशें राॅड्रीग्स हांणी सांगलें.