भांगरभूंय | प्रतिनिधी
बटाला : बिरेस्तारा रातीं सुमार साडेणव वरांचेर पंजाबांतल्या गुरुदासपूरच्या बटाला हांगा खांपो गुंड जग्गू भगवानपुरियाची आवय हरजीत कौर आनी ताचो वांगडी करणवीर हांचो गुळयो घालून खून केलो.
हे विशींचे म्हायती प्रमाण, तीं गाडयेंतल्यान खंयतरी वताली, तेन्ना दोनचाकी वेल्यान आयिल्ल्या हल्लेकारांनी गाडयेचेय फारपेट केली. मुळाव्या तपासांत अशें दिसून आयलें, करणवीर होच तांचें लक्ष्य आशिल्लें. करणवीर हाका जाग्यारूच मरण आयलें, जाल्यार कांय गुळयो जग्गुचे आवयकूय लागल्यो. तिका बेगोबेग हॉस्पिटलांत व्हेली. मात थंय तिका मरण आयिल्ल्याचें सांगलें.
हे घडणुके उपरांत हल्लो करपी पळून गेले. पुलीस घडणुके सुवातेर येवन आरोपींचो सोद घेवपाक सुरवात केली.
पुलीस हे घडणुकेक भितरल्या टोळी झुजा कडेन जोडटात. कारण जग्गू भगवानपुरिया हो बर्याच काळा सावन पंजाबांत गुन्यांवकारांच्या जगात सक्रीय आसा ताचोे जायत्या टोळयां कडेन संघर्श जाला. तेन्नाच बंबीहा टोळयेन हे पुराय घडणुकेची जापसालदारकी स्विकारल्या.
बंबीहा टोळयेन जापसालदारकी घेतली
हरियाणांतले दोग खांपे गुंड प्रभु दसुवाल आनी कौशल चौधरी हांणी सोशल मीडियाचेर हे घटनेची जापसालदारकी स्विकारली. हे दोगूय बंबीहो टोळये कडेन संबंदीत आसात. पुलीस हो टोळी झुजाचो परिणाम मानत आनी उच्च पांवड्यावेलो तपास सुरू केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
