भांगरभूंय | प्रतिनिधी
पणजी: कर्मचारी भरती आयोगान जायरात दिल्ल्या शिक्षक, लायब्ररीयन, तंत्रीक अधिकारी पदां खातीरची पयली सीबीटी परिक्षा 27 जुलयाक जातली. परिक्षेचे तारखे विशींची नोटीस आयोगान जारी केल्या. परिक्षेचें वेळापत्रक, अॅडमीट कार्ड उमेदवारांक ईमेलाचेर धाडटले. तशेंच वेळापत्रक, अॅडमीट कार्ड 15 जुलय मेरेन आयोगाच्या वॅबसायटीचेर उपलब्ध जातलें, अशें मंडळान कळीत केलां.
आयोगान 2 मे 2025 दिसा शिक्षक, पीएसआय, तंत्रीक अधिकारी पदां भरपा खातीर जायरात दिल्ली. शिक्षकांची कांय पदां सोडलीं जाल्यार हेर पदां खातीर अर्ज करपाची निमाणी तारीख सोंपल्या. हाका लागून आयोगान परिक्षेची तारीख जाहीर केल्या.
विद्यालयांनी चित्रकला शिक्षकांची 2 पदां, सरकारी मुळाव्या शाळांनी प्रशिक्षीत इंग्लीश शिक्षकां खातीरची 14 पदां आनी लायब्ररीयनची 10 पदां भरपा खातीरची पयली सीबीटी परिक्षा 27 जुलयाक जातली.
तशेंच तंत्रीक सहायक (सीव्हील) 57 पदां, तंत्रीक सहाययक (मेकॅनीकल/इलेक्ट्रीकल)चीं 4 पदां, तंत्रीक सहायक (संगणक/इलेक्ट्रॉनीक) 1 पद, प्रोग्रामर 2 पदां, तंत्रीक अधिकारी (आयटी) 1 पद आनी कनिश्ट तंत्रीक अधिकाऱ्याची 2 पदां भरपा खातीरची सीबीटी परिक्षा 27 जुलयाक जातली. उमेदवारांनी चड म्हायती खातीर आयोगाची वॅबसायट पळयत रावची, अशें आयोगान कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
