भांगरभूंय | प्रतिनिधी
सुभाष फळदेसाय : पोरण्यो फेरीबोटी बदलपाचें उतर
भांगरभूंय । प्रतिनिधी
पणजीः फेरीबोट बंद पडपाचे प्रकार आडावपा खातीर डबल इंजीन फेरीबोटी चालीक लायतले. चडश्यो फेरीबोटी पोरण्यो जाल्यात. तांचे सुवातेर नव्यो डबल इंजीन आशिल्ल्यो फेरीबोटी घालपाचो विचार आसा. एक इंजीन बंद पडल्यार दुसरें इंजीन फेरीबोटीक आदार दितलें, अशें न्हय येरादारी मंत्री सुभाष फळदेसाय हांणी सांगलें.
बुधवारा सांजे कुमारजुवें कानालांत धावजी ते तोल्टो फेरी धक्या मजगतीं यो-वच करपी फेरीबोट अचकीत बंद पडली. इंजिनांत इबाड जाल्यान ती न्हंये मदेगाद उरली. ह्या वेळार कानालांतल्यान बार्ज हे न्हंयेंत आयली. बार्जीच्या तारवट्याचे शिटुकसाणेक आनी न्हयेदेगेर आशिल्ल्या तरणाट्यांक लागून व्हडलो अनर्थ टळ्ळो.
हे घडणुकेचेर स्पश्टीकरण दितना मंत्री फळदेसाय उलयताले. उदकाच्या नेटाक लागून फेरीबोट भरकटील्ल्यान इंजिनाचेर पेच येवन ती बंद पडली, अशें रजांव फळदेसाय हांणी दिलें.
पावस वादळाची परिस्थिती, न्हंयेक भरती आशिल्ली आनी उदकाक नेटाचो लोट मारतलो. ह्या लोटाक लागून फेरीबोट भरकटपाक सुरवात जाली. ती नियंत्रणांत हाडटना फेरीबोटीच्या इंजिनाचेर बरोच पेच आयलो. इंजीन तापिल्ल्यान तें बंद पडलें. 10 मिण्टांच्या विसवा उपरांत इंजीन सुरू जाले आनी फेरीबोट आपल्या मार्गार लागली, अशी म्हायती फळदेसाय हांणी दिली.
ह्याच वर्सा अशी पयली घडणूक घडल्या. फेरीबोटीचें तापिल्लें इंजीन थंड जावन रोखडेंच सुरू जालें, हे खातीर व्हडलो धोको असो नाशिल्लो. पूण बार्ज आयिल्ल्यान आनी तिका अशीर बाट आशिल्ल्यान थंय व्हड दुर्घटणां घडूं येताली. ताका लागून आमी आतां जतनाय घेवन सुरक्षा उपाय येवजण चालीक लायतले, अशें फळदेसाय हांणी म्हणलें.
हे प्रकार बंद करपा खातीर आमी पयलीच्या पोरण्यां फेरीबोटींचे सुवातेर आमी नव्यो डबल इंजिनाच्यो फेरीबोटी घालतले. जर एक इंजीन बंद जालें जाल्यार दुसऱ्या इंजिनाचेर ह्यो फेरीबोटी चलपाक शकतात, असो विस्वास फळदेसाय हांणी उक्तायलो. बंदर कप्तान खात्या कडल्यान आमी सगळ्या फेरीबोटींचें वैध फिटनेस प्रमाणपत्र घेतलां. फिटनेस प्रमाणपत्राची वैधता सोंपचे पयलीं आमी ताचें नुतनीकरण करून घेतात, अशें फळदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
