भांगरभूंय | प्रतिनिधी
सांगें: सांगेंच्या उपनगराध्यक्षपदार आदले मंत्री पांडु वासु नायक हांचे पूत संगमेश्वर नायक हांची विरोधा विणें निवड जाली. ह्या वेळार निर्वाचन अधिकारी म्हणून उपजिल्लोधिकारी मिलिंद्र वेळीप हांणी काम पळयलें. आदले उपनगराध्यक्ष सय्यद इकबाल हांचो कार्यकाळ सोंपिल्ल्यान तांणी पदाचो राजिनामो दिल्लो. ती सुवात रिती आशिल्ल्यान आनी संगमेश्वर नायक हांचो एकूच अर्ज आयिल्ल्यान ताची विरोधा विणें निवड घोशीत केली. सांगें नगरपालिका सभाघरांत आयोजीत केल्ले हे कार्यावळीक धा नगरसेवकां मदले चार नगरसेवक सोडल्यार, नगराध्यक्ष संतिक्षा गडकार, सय्यद इकबाल, प्रिती नायक, अर्चना गांवकार आनी स्वेता नायक तारी हजर आशिल्लीं.
ह्या वेळार उपनगराध्यक्ष संगमेश्वर नायक हांणी आपली निवड केल्ले खातीर सगल्या नगरसेवकांचे उपकार मानतना, मंत्री सुभाष फळदेसाय हांच्या सहकार्यान उरिल्लीं करतलों. तशेंच उदरगतीच्या कामांत भर दितना सगल्या नगरसेवकांक विस्वासांत घेवनूच मुखार वतलों अशें सांगलें.
ह्या वेळार नगराध्यक्षा संतिक्षा गडकार, स्वेता नायक तारी, दिपक नायक हांणी विचार मांडले. येवकार, सुत्रसंचालन आनी उपकार सय्यद इकबाल हांणी मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
