भांगरभूंय | प्रतिनिधी
पणजी : उत्तर गोंय जिल्लो ग्रामीण विकास प्राधिकरणा वतीन (डीआरडीए) विवीध १९ पदां खातीर भरती करतले. सगलीं पदां एका वर्साच्या कंत्राटी तत्वाचेर भरतले. हातूंत १२ सुवातो ह्या गट वेवस्थापक – (ब्लॉक मॅनेजर – बीएम्स) पदां खातीर आसात. ह्या सगल्या सुवातां खातीर १४ ते १८ जुलय मजगतीं मुलाखती जातल्यो. जाल्यार प्रदुशण नियंत्रण मंडळा वतीन ११ पदां खातीर भरती करतले. हातूंत ५ सुवातो कनिश्ठ पर्यावरण अभियंत्यांच्या आसात. हीं पदां कायमस्वरूपी तत्वांची आसतली. हे खातीर अर्ज करपाची निमाणी तारीख ११ जुलय आसा.
डीआरडीऐंत दीन दयाळ उपाध्याय – ग्रामीण कौशल्य येवजण प्रकल्पा खाला भरती करतले. हातूंत राज्य प्रकल्प वेवस्थापकाच्या ४, जिल्लो समन्वयकाच्या २, एचआर असोसिएटच्या एका पदाचो आसपाव आसा. राज्य प्रकल्प वेवस्थापक पदां खातीर ग्रामीण वेवस्थापन संगणक शास्त्र, वाणिज्य वा वेवस्थापन विशयांतल्या पद्व्युत्तर पद्वी वा पद्व्युत्तर पद्वी आसप गरजेचें. ह्या पदां खातीर ५ वर्सां पसून अदीक अणभव आसप गरजेचें. पदां खातीर मासीक ५० हजार रुपया वेतन दितले.
हाका लागून १४ जुलयाक सकाळीं १० वरांचेर नोंदणी, जाल्यार दनपरां २.३० वरांचेर सरळ मुलाखती घेतले. जिल्लो समन्वयक आनी एचआर पदा खातीर १६ जुलय, जाल्यार गट वेवस्थापक पदा खातीर १८ जुलयाक सरळ मुलाखती घेतले. जिल्लो समन्वयक आनी एच आर पदा खातीर म्हयन्याक ४० हजार रुपया जाल्यार गट वेवस्थापक पदा खातीर म्हयन्याक ३० हजार रुपया पगार आसतलो. चड म्हायती खातीर https://www.goa.gov.in/ हे वेबसायटीचेर वयचें असो उलो मारला.
प्रदूशण नियंत्रण मंडळा वतीन सहाय्यक कायदा अधिकारी, शास्त्रीय सहाय्यक (मायक्रोबायोलॉजी) दरेकी एक तर एमटीएस आनी लॅब अटेंडंट च्या दरेकी एके सुवातेर भरती जातली. सगल्या सुवातां खातीर पिराय मर्यादा ४५ वर्सां आसात. हे विशीं चड म्हायती मंडळाचे https://goaspcb.gov.in/ हे वेबसायटीचेर उपलब्ध आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
