भांगरभूंय | प्रतिनिधी
मुंबय, खबरां संस्था: केंद्रीय माध्यमीक शिक्षण मंडळाची (सीबीएसई) धावेची परिक्षा ह्या शिक्षणीक वर्सा पसून दोन फावटीं जावपाची आसा. हाका लागून फेब्रुवारी आनी मे अश्यो दोन संदी विद्यार्थ्यांक एका वर्सांतूच मेळटल्यो.
सीबीएसई धावेची परिक्षा वर्सांतल्यान दोन फावटीं घेतले हें ह्यान पयलीं जाहीर केल्लें. ते प्रमाण सीबीएसईन बुधवारा परिपत्रक जाहीर करून अंदूंच्यान ह्या निर्णयाची अंमुबजावणी जातली हें जाहीर केलें. परिक्षेचो काळ, नेम, निकाल जाहीर करपाचो काळ ह्यो गजाली स्पश्टपणान जाहीर केल्यात. विद्यार्थ्यांवेल्या परिक्षेचो ताण उणो जावचो, तांकां कामगिरी सुदारपा खातीर संद मेळची आनी शिकोवपाची संस्कृती उणी जावची ह्या हेतान हो निर्णय घेतला.
कितें जातलें?
सीबीएसईच्या नव्या निर्णया प्रमाण २०२६ ह्या शिक्षणीक वर्सा पयली परिक्षा फेब्रुवारी मजगतीं घेवन ताचो निकाल एप्रिलांत जाहीर करतले. दुसरी परिक्षा मे म्हयन्यांत घेवन ताचो निकाल जुनांत दाखल करतले. धावेच्या सगल्या विद्यार्थ्यां खातीर फेब्रुवारींत जावपी परिक्षा अनिवार्य आसतली. हे परिक्षेंत पास जाल्ल्या विद्यार्थ्यांक विज्ञान, गणीत, समाजीक शास्त्र आनी भास हाचे मदल्या खंयच्याय ती विशयांत आपले गूण सुदारपाची संदी मे म्हयन्यांत जावपी परिक्षेंत मेळटली. मात पयले परिक्षेंत तीन वा ताचे परस चड विशयांनी पास जाल्ल्या विद्यार्थ्यांक मे म्हयन्यांत जावपी दुसरी परिक्षा दिवपाक मेळची ना. त्या विद्यार्थ्यांक फुडल्या वर्साचे फेब्रुवारी म्हयन्याचे परीक्षे मेरेन वाट पळोवची पडटली. तशेंच भुरग्यांचें भितरलें मुल्यांकन हें फकत मुखेल परिक्षे पयलीं एकदांच जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
