भांगरभूंय | प्रतिनिधी
आनीक दोगांचो मंत्रीमंडळांत आस्पाव करपाच्यो हालचाली
भांगरभूंय । प्रतिनिधी
पणजी : सभापती रमेश तवडकार हांकां मंत्रीपद दिवपाचें निश्चीत जालां. ह्याच सप्तकांत तांचो सोपूत सुवाळो जातलो. गोपां कडल्यान ही म्हायती मेळ्ळ्या. मंत्रीमंडळांत आनीक दोन नव्या मंत्र्यांचो आस्पाव करपाचे यत्न सुरू आसात. सभापतीपदाचो प्रस्न सुटावो करपाच्यो हालचाली सुरू आसात. मंत्र्यांच्या सोपूत सुवाळ्या उपरांत मंत्र्यांच्या खात्यांनी व्हड बदल जातले.
फाटल्या सप्तकांत गोविंद गावडे हांचें मंत्रीपद काडले उपरांत एक मंत्रीपद रितें जालां. गोविंद गावडे हे अनुसूचीत जमातीचे (एसटी) फुडारी आसात. अनुसूचीत जमातीक (एसटी) प्रतिनिधीत्व दिवपा खातीर सभापती रमेश तवडकार हांकां मंत्रीपद दिवपाचो निर्णय जाला. तशेंच आनीक दोगांक मंत्रीपदा वयल्यान काडून दोन नव्या मंत्र्यांचो आस्पाव करपाच्यो हालचाली सुरू जाल्यात. हाका लागून मंत्रीपदाचे एके सुवाते खातीर अजून मेरेन सोपूत सुवाळो जावंक ना. मंत्रीपदा खातीर प्रवीण आर्लेकार, डिलायला लोबो, संकल्प आमोणकार, मायकल लोबो, दिगंबर कामत हे सगळे इत्सूक आसले तरी सभापतीपदा खातीर कोणूच इत्सूक ना. रमेश तवडकार हांचो सोपूत सुवाळो जाले उपरांत सभापतीपदा खातीर कोणाची निवड करची? हो प्रस्न आसा. सभापतीपदा खातीरचें नांव निश्चीत जाले उपरांत तवडकार हांच्या सोपूत सुवाळ्याची तारीख थारतली, अशें कळटा. सभापतीपदा खातीर ज्येश्ठता तशेंच सभाघराचें कामकाज चलोवपाची जाण आसप गरजेचें आसता. मुख्यमंत्री डॉ. प्रमोद सावंत हांचे कडेन शिक्षण, भौशीक बांदकाम, खण, अर्थ, गृह, म्हायती अशीं म्हत्वांचीं खातीं आसात. गोविंद गावडे हांचें मंत्रीपद काडले उपरांत तांचे कडलीं कला आनी संस्कृती, खेळ हीं म्हत्वाचीं खातीं आतां मुख्यमंत्र्यां कडेन आयल्यात. मुख्यमंत्री डॉ. प्रमोद सावंत हांचे उपरांत विश्वजीत राणे (भलायकी, रानां, नगरनियोजन), मॉवीन गुदिन्हो (येरादारी, उद्देग, पंचायत), सुदिन ढवळीकार (वीज), रोहन खंवटे (पर्यटन, आयटी) हांचे कडेन म्हत्वाचीं खातीं आसात. हेर मंत्र्यां कडेन पेझाद खातीं ना. आतां सोपूत सुवाळो जाले उपरांत व्हड प्रमाणांत खात्यांनी बदल जातलो. भौशीक बांदकाम खातें लेगीत नव्या मंत्र्यां कडेन वचपाचीं चिन्नां आसात. वेंचणुके उपरांत मुख्यमंत्री डॉ. प्रमोद सावंत हांणी जीं खातीं दिल्लीं तींच खाती मंत्र्यां कडेन आसात. निलेश काब्राल हांकां मंत्रीमंडळांतल्यान काडले उपरांत तांचे कडलें भौशीक बांदकाम खातें मुख्यमंत्र्यांन आपणा कडेन दवरलें. तांचे कडलीं हेर खातीं काब्रालाचे सुवातेर मंत्रीपद दिल्ल्या आलेक्स सिक्वेरा हांकां दिलीं. येरादारी, पंचायत, उद्देग, पर्यटन, आयटी, नगरनियोजन, भलायकी हीं खातीं आसा त्याच मंत्र्या कडेन आसा. नव्या मंत्र्यांच्या सोपूत सुवाळ्या उपरांत खात्यां मदीं व्हड बदल जातले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
