भांगरभूंय | प्रतिनिधी
पणजी : कोलवाळ पुलिसांनी मध्यवर्ती बंदखणींत गांजो पावोवपाचो यत्न करपी चवगांची टोळी उक्तडार हाडली. अटक केल्ल्यां मदीं तीग तरणाटे आनी एका नेण्ट्या भुरग्याचो आसपाव आसा. आरोपींनी सकाळीं बंदखणीचे वणटींतल्यान गांजाचीं सात पॅकेटां बॉलाचो आकार करून भितर उडयलीं. हे पॅकेट्स बंदखणींतल्या कैद्यां मेरेन पावोवपा खातीर उडयिल्ल्याची मुळावी म्हायती मुखार आयली.
नेमकें प्रकरण कितें?
१५ जुनाक रातच्या ११.५२ वरांचेर कोलवाळे बंदखणीचे उपअधीक्षक पुलीस स्टेशनांत आयले आनी सात गुळयां सयत एक पांचव्या रंगाचे बंद पाकीट जमा करीत गुन्यांवाची म्हायती दिली. ह्यान पयलीं १४ जुनाक सकाळीं सुमार १०.१५ वरांचेर वॉच टॉवर नं. ३ चेर तैनांत आशिल्ल्या शिपायांच्या निदर्शनाक हीं पॅकेटां मेळ्ळीं. ह्या बॉलाच्या आकारांतल्या गुळ्यांनी गांजो सांपडलो. मालाचें वजन १.३९७ किलो आशिल्ल्यान ताचें मोल सुमार १.४० लाख रुपया आशिल्ल्याचो अदमास आसा. ह्या प्रकरणांत एनडीपीएस कायद्याच्या कलम २०(ब)(ळळ)(इ) खाला गुन्यांव दाखल केला.
तांत्रीक तपासांतल्यान आरोपींची वळख पटोवपाक पुलिसांक येस आयलें. अटक केल्ल्या मदीं गौतम तलवार, सॅम्युअल पुजारी आनी जाफर मुल्ला ह्या तिगांचो आसपाव आसा. चवथो आरोपी नेण्टो आशिल्ल्यान ताका बालन्याय मंडळा मुखार हजर केलां आनी ताका पालकांच्या ताब्यांत दिला. ताका २६ जुनाक परत हजर रावपाचे आदेश दिल्यात.
हे टोळयेन १४ जुनाक सकाळीं गांजाचें पॅकेट बंदखणीचे वणटींतल्या भितर उडयलें. हें पॅकेट एका विशिश्ट कैद्याक पावोवपाचो हेत आशिल्लो, असो पुलिसांक अदमास आसा. ह्या प्रकरणाचो तपास सुरु आसा. आनीक आरोपींचो सोद घेवप चालू आसा. ही कारवाय उत्तर गोंय पुलीस अधीक्षक राहुल गुप्ता, म्हापशेंचे पुलीस उपअधीक्षक विल्सन डिसोझा हांच्या मार्गदर्शनाखाला आनी कोलवाळ पुलीस निरीक्षक संजीत कांदोळकार हांच्या नेतृत्वा खाला आज सकाळीं केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
