भांगरभूंय | प्रतिनिधी
येजमान वॅस्ट इंडिजाक तिसरे आनी निमाणे वन डे मॅचींत 119 धांवड्यांनी हारोवन भारतान माळ 3-0 अशा फरकान जिखली. शिखर धवनान टॉस जिखून पयलीं बॅटींग करपाचो निर्णय घेतलो. पावसाक लागून शुभमन गिलाक कारकिर्दींतलो पयलो शेंकडो चुकलो. तो 98 धांवड्यांचेर नाबाद उरलो. ताचे खेळी नेटार भारतान 36 ओव्हरींनी 225 धांवड्यो केल्यो.
वॅस्ट इंडिजाक पावसाक लागून डीएलएस नेमा प्रमाण 35 ओव्हरींनी 257 धांवड्यांची मोख मेळ्ळी.
धवन आनी गिल हांणी पयले विकेटी खातीर 113 धांवड्यांची भागिदारी केली. धवन (58) बाद जाल्या उपरांत पावस आयलो आनी खेळ दोन वरां थांबोवचो पडलो. पावस थांबल्या उपरांत श्रेयस अय्यर आनी सुर्यकुमार यादव (8) बाद जाले. दुसरे खेपे पावसान हाजेरी लायली त्या वेळार गिल 98 धांवड्यांचेर नाबाद आशिल्लो. भारताचो डाव पावसाक लागून सोंपलो आनी विंडिजाक जैता खातीर 257 धांवड्यांची मोख मेळ्ळी.
धांवड्यांचो फाटलाव करतना विंडिजाचो डाव 137चेर सोंपलो. मोहम्मद सिराजान दुसरे ओव्हरींत दोन धपके दीत येजमान पंगडाक बॅकफुटाचेर धुकल्लो.
कायल मेयर्स आनी शेमार ब्रुक्स हांकां ताणें बाद केले. दोगूय रोखडे बाद जाल्या उपरांत शाई होपान कांय वेळ पंगडाक वाटावपा खातीर संघर्श केलो. पूण, तो 33 बॉलांनी 22 धांवड्यो करून बाद जालो.
शाई होपा खेरीत ब्रॅण्डन किंग आनी निकलोस पुरन दरेकी 42 धांवड्यो केल्यो. ह्या तिगां खेरीत विंडिजाच्या एकाय बॅट्समनाक दोट्टी आंकडो लेगीत हुपपाक जमलो ना. भारता वतीन युजवेंद्र चहलान चार, मोहम्मद सिराजान आनी शार्दुल ठाकूरान दरेकी दोन विकेटी घेतल्यो. अक्षर पटेल आनी प्रसिद्ध कृष्णा हाका दरेकी एक विकेट फावो जाली.
ते पयलीं शुभमन गिलान 98 बॉलांनी नाबाद 98 धांवड्यो केल्यो. हातूंत दोन सक्यांचो आनी सात चवक्यांचो आस्पाव आशिल्लो. ताणें शिखर धवना वांगडा पयले विकेटी खातीर 113 आनी दुसरे विकेटी खातीर श्रेयस अय्यरा (44) वांगडा 86 धांवड्यांची भागिदारी केली. गिलाची मॅन ऑफ द मॅच आनी मॅन ऑफ द सिरिजा खातीर निवड जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
