भांगरभूंय | प्रतिनिधी
पणजी: गोंय कृशी म्हाविद्यालयांत सहायक प्राध्यापकांच्यो 12 जाल्यार समुपदेशकाच्या एका पदा खातीर भरती करतले. वट्ट 13 पैकीं 9 सुवातो कंत्राटी पद्दतीचेर जाल्यार 4 सुवातो व्याख्यान आधारीत (लेक्चर बेसीस) पद्दतीन भरतले. वट्ट सुवातां मदीं 10 सुवातो आरक्षीत आसतल्यो.
अर्ज करपाची निमाणी तारीख 4 जुलय मेरेन आसा. पदा खातीरचे अर्ज करपाची प्रक्रिया, अटी आनी हेर म्हत्वाची म्हायती म्हाविद्यालयाच्या आनी गोंय विद्यापिठाच्या अधिकृत संकेतथळार उपलब्ध आसात.
म्हाविद्यालयांत कंत्राटी तत्वाचेर कृशीशास्त्र विशयाच्या सहायक प्राध्यपकांच्यो तीन सुवातो भरतले. जाल्यार कृशी विस्तार आनी संज्ञापन, कृशी रसायनशास्त्र आनी मृदा शास्त्र, वनस्पती रोग विज्ञान, प्राणी आनी डेरी विज्ञान आनी कृशी वेवस्थापक पदा खातीर दरेकी एक सहायक प्राध्यापकाची भरती करतले. म्हाविद्यालय समुपदेशकाचे एके सुवाते खातीर भरती करतले. हीं सगलीं पदां कंत्राटी पद्दतीन भरतले. जाल्यार सांख्यिकीशास्त्र, संगणक शास्त्र, कृशी अभियांत्रिकी आनी जेनेटिक्स आनी वनस्पती ब्रिडींग ह्या पदां खातीर दरेकी एक सहायक प्राध्यपकाची भरती करतले.
सहायक प्राध्यापकांच्या पदा खातीर उमेदवार 55 टक्क्यां परस चण गूण मेळोवन पदव्युत्तर पदवी पास जाल्लो आसप गरजेचें आसा. तशेंच युजी सी वा मान्यताय प्राप्त शिक्षण संस्थे कडल्यान नेट वा सेट वा पीएचडी मेळयिल्ली आसप गरजेचें आसा.
कृशी वेवस्थापक पदा खातीर कृशी अभियांत्रिकी वा कृशी शास्त्र विशयांतल्या पदव्युत्तर पदवी आसप गरजेचें आसा. तशेंच नेट वा सेट वा पीएचडी आसप गरजेचें आसा. समुपदेशक पदा खातीर मानसशास्त्र विशयांतल्या पदव्युत्तर पदवी आसप गरजेचें आसा.
ह्या पदां खातीर अर्ज करपी व्यक्ती कडेन गोंयांतल्या पंदरा वर्साचो राबितो दाखलो आसप गरजेचो आसा. तशेंच उमेदवाराक कोंकणी भाशेंचे ज्ञान आसप लेगीत गरजेचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
