भांगरभूंय | प्रतिनिधी
म्हापशें: घाटेश्वरनगर, आसगांवां शॉर्ट सर्किट जाल्ल्यान उजो लागून प्रवासी रिक्षा लासून गोबर जाली. हातूंत रिक्षेचे सुमार एका लाखाचें लुकसाण जालें.
ही घडणूक मंगळारा 24 वेर दनपारां 1 वरांच्या सुमाराक घडली. रिक्षा चालक प्रवीणकुमार नायक हांणी आपल्या पुताक म्हापश्यां शाळेंत सोडलो आनी जीए 03 एएच 0189 क्रमांकाची प्रवासी रिक्षा घेवन ते म्हापशें सावन आसगांवां प्रवासी भाडें मारपा खातीर वताले.
वाटेर घाटेश्वरनगर आसगांवां आग्नेल इन्स्टिट्युटा कुशीचे देंवतेर अचकीत रिक्षाच्या इंजिनांत शॉर्ट सर्कीट जाली आनी उज्यान पेट घेतलो. तेच बरोबर नायक प्रसंग वळखून थंयच रिक्षा पार्क केली आनी उजो पालोवपी दळाक आपयलो.
घडणुकेची म्हायती मेळटकच म्हापशें उजो पालोवपी दळाचे हवालदार शाहीद खान हांच्या फुडारपणा खाला जयेश कळंगूटकार, भगवान पाळणी, विष्णू केसरकार आनी शाहू शेळके ह्या जवानांनी घडणूक थळार धांव घेतली आनी उजो नियंत्रणांत हाडलो. पूण तो मेरेन पुराय रिक्षा लासून गेल्ली. हणजूण पुलिसांनी घडणुकेचो पंचनामो केलाे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
