भांगरभूंय | प्रतिनिधी
पणजी: नगरपालिका प्रशासनान पणजी म्हानगरपालिका प्रभाग फेररचणूक प्रक्रिया हातांत घेतल्या. ही प्रक्रिया राज्य वेंचणूक आयोगा कडल्यान जावची अशी मागणी करपी याचिका गोंयच्या मुंबय उच्च न्यायालयांत दाखल केल्या. ह्या प्रकरणाची न्यायालयान सुनावणी घेवन निवाडो राखून दवरला.
ह्या प्रकरणांत मिनिनो डिक्रुझ हांणी याचिका दाखल केल्या. तातूंत तांणी गोंय सरकार, गोंय वेंचणूक आयोग, नगरपालिका प्रशासन आनी पणजी म्हानगरपालिका हांकां प्रतिवादी केल्यात.
हे विशीं मंगळारा न्यायालयांत सुनावणी जाली तेन्ना पणजी म्हानगरपालिका प्रभाग फेररचणुकेची प्रक्रिया गोंय सरकारान नगरपालिका प्रशासना कडेन दिल्या. ताका लागून तातूंत व्हड प्रमाणांत हस्तक्षेप जातलो. ते खातीर वयली प्रक्रिया गोंय वेंचणूक आयोगा कडेन दिवपाची मागणी केल्या.
वयली प्रक्रिया गोंय वेंचणूक आयोगा वतीन करप असो कसलोच कायदो ना. ताका लागून ही प्रक्रिया नगरपालिका प्रशासन वा हेर खंयच्याय प्राधिकरणा कडेन दिवंक शकतात असो दावो सरकारान केला. ह्या प्रकरणांत न्यायालयान दोनूय पक्षांची बाजू आयकून घेतले उपरांत याचिके वेलो निवाडो राखून दवरला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
