बार्देसांत पडझड : निल्ला, ओशेलांत झाडा, जाल्यार कळंगूटे होर्डिंग पडलें
भांगरभूंय | प्रतिनिधी
म्हापशें: वादळ, पावस वार्याक लागून बार्देसांत निल्ला, कळंगूटे आनी ओशेल, शिवोले पडझड जाली. निल्लीच्या सती देवी देवळाचेर झाड कोसळून घुमटींचें लुकसाण जालें. जाल्यार ओशेल शिवोले आदले मंत्री दयानंद मांद्रेंकार हांच्या घराचे राखणे वणटीचेंय लुकसाण जालें. तशेंच कळंगूटे रस्त्यावेलो होर्डींग बोर्ड कोसळ्ळो.
निल्ला कोको बीच दर्यादेगेर आशिल्ल्या श्री सती देवी देवळा कडेन झाड कोसळ्ळें. हाका लागून देवळाच्या कुशीकच्या घुमट्यांचें लुकसाण जालें. हातूंत सुमार ५५ हजारांचें लुकसाण जालें. पिळर्ण उजो पालोवपी दळाचे हवालदार नरेंद्र शेटये हांच्या नेतृत्वा खाला जवानांनी झाड कापून कुशीक काडलें. ही घडणूक सकाळीं ६.४५ वरांचेर घडली.
ओशेल शिवोले झाड कोसळून आदले मंत्री दयानंद मांद्रेंकार हांच्या घराची राखणे वणट कोसळ्ळी. हाका लागून तांचें २० हजारांचें लुकसाण जालें. तशेंच लायटीच्यो सरयो तुटल्यो. ह्यो सरयो जोडून वीज कचार्यांनी कांय वरांनी लायट पुरवण सुरळीत केली. ही घडणूक मंगळारा दनपरां सुमार १२.४५ वरांचेर घडली. म्हापशें उजो पालोवपी दळाचे हवालदार विष्णू गांवस हांच्या नेतृत्वाखाला जवानांनी हे झाड कापून कुशीक केलें.
कळंगूटे पल्मारीन हॉटेला लागसारा कळंगूटे- म्हापश्यां मुखेल रस्त्याचेर उबारिल्लें होर्डिंग हुमटून सकयल रस्त्यार पडलें. ही घडणूक फाञतोडेर घडिल्ल्यान थंय कोणाक कांय जावंक ना. हे हॉर्डिंग रस्त्यार पडिल्ल्या हांगची येरादारी स ते सात वरां आडकून उरली. बांदकाम अधिकारी तशेंच संबंदीत होर्डिंगच्या कंत्राटदारान फाट केल्ल्यान निमाणें म्हापशें उजो पालोवपी दळाचे हवालदार रणजीत गांवकार हांच्या नेतृत्वाखाला जवानांनी हें होर्डिंग कापून थळाव्यांचे मजतीन कुशीक केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
