भांगरभूंय | प्रतिनिधी
पणजी : जनतेची इत्सा आसल्यार आनी म्हज्या नशिबांत आसल्यार हांव मुख्यमंत्री जातलों. कोणायकूय जाय म्हणून हांव मुख्यमंत्री जावचो ना, अशें वीजमंत्री सुदीन ढवळीकार हांणी म्हणलें. स. मनोहर पर्रीकार दुयेंत आसतना मुख्यमंत्री म्हणून तेन्ना म्हाका विजय सरदेसाय, रोहन खंवटे हांणी विरोध केल्लो. म्हाका कोणी विरोध केला ती गजाल सर्वश्रूत आसा, अशेंय तांणी मुखार म्हणलें.
मुख्यमंत्री डॉ. सावंत हांच्या आदिवासी कल्याण खात्याचेर टिका केले उपरांत गोविंद गावडे हांकां मंत्रीपदावेल्यान काडलो. मंत्रिपद गेल्या उपरांत गोविंद गावडे हांणी माशेलांत जाहीर सभा घेवन कार्यकर्त्यां मुखार मनोगत उक्तायलें. स. मनोहर पर्रीकार जेन्ना दुयेंत आशिल्ले तेन्ना उलोवपा खातीर सुदिन ढवळीकार हांचें नांव तांणी सुचयल्लें. ढवळीकार हांकां हांवें विरोध केलो आनी डॉ. सावंत हांच्या नेतृत्वाक फाटबळ दिलें, अशें वक्तव्य गोविंद गावडे हांणी माशेलांतले सभेंत केल्लें. हे विशीं पत्रकारांनी विचारलें तेन्ना वीजमंत्री ढवळीकार हांणी वयलें वक्तव्य दिले.
ढवळीकार हे विधानसभेंत १९९९ सावन आमदार आसात. जायतीं वर्सां जालीं मंत्री आसले तरी आजनय ते मुख्यमंत्री जावंक ना. जनतेक जाय आसल्यार हांव मुख्यमंत्री जातलों, अशें तांणी म्हणलें.
मगो पक्षाचें काम प्रियोळांतूच न्हय तर पुराय गोंयांत सुरू आसा. मगो पक्ष घटमूट करपाचेरूच म्हजें लक्ष आसा. मगो हो कोणशा कोणशांतले जनतेचो पक्ष. दाबोळी मतदारसंघांतूय मगोन ५ हजार मतां घेतल्यां. म्हजे कडेन आयिल्लो मनीस प्रियोळांतलो काय काणकोणचो, हें हांव पळयना. हांव ताका शक्य आसता तितली मजत करतां, अशें मगो विशे मगो विशीं उलयतना तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
