भांगरभूंय | प्रतिनिधी
पणजी : गोंय पर्यटन विकास महामंडळान (जीटीडीसी) आयतारा, २९ जूनाक तांबडी सुर्ला घसघश्याचेर खाशेली मान्सून ट्रॅकींग मोहीम आयोजीत केल्या.
तांबडी सुर्ला घसघसो गोंयच्या दोळे दिपकावपी थळां मदलो एक. हे मोहिमेचो एक भाग म्हणून, ह्या ट्रॅकाक येवप्यांक तांबडी सुर्लाच्या प्राचीन शिव मंदिराकूय भेट दिवपाक मेळटली. देवळा पसून घसघश्या मेरेन वचपी वाट दाट रानान, सवणीं, पाखे आनी शांत सैमीक वातावरणा सयत एक वेगळो अणभव दिता.
ह्या घसघश्या मेरेन वचपा खातीर ९० मिनटां लागतलीं. हो ट्रॅक शारिरीक स्थिती बरी आशिल्ल्यां खातीरुच आयोजीत केला. ह्या ट्रॅकींगाक दरेकल्याक १४००/- रुपया फारीक करचे पडटले. हातूंत येरादारी, मार्गदर्शक सेवा आनी जेवणाचो आसपाव आसतलो. ह्या ट्रॅकाक येवप्यां खातीर बसीची वेवस्था केल्या. म्हापशें रेसिडेन्सीच्यान सकाळीं ७ वरांचेर आनी मडगांव रेसिडेन्सीच्यान सकाळीं ६:४५ बस सुट्टली. पणजेच्या पर्यटन भवना कडेन सकाळीं ७:३० वरांचेर पोरणें गोंय, बाणस्तारी, फर्मागुडी आनी फोंडेंच्यान येतल्यांक बसींत घेतले. वाटेकार जावप्यांक कपड्यांची आनीक एक जोडी, रेनवेअर, ट्रेकिंग शूज, स्नॅक्स आनी दुर्बीण हाडचें अशें कळयलां. सिगरेट ओडपाची आनी सोरो पिवपाची परवानगी ना. सगल्यांनी सैमाचो अणभव घेतना त्या वाठारांत कोयर करप वा प्लास्टीकाचो वापर करचो न्हय, असो उलो आयोजकांनी मारला.
बुकिंग आनी चवकशे खातीर इत्सुकांनी अनिल दलाल (९४२२० ५७७०४ / ८३७९० २२२१५) हांचे कडेन संपर्क करचो. तशेंच ऑनलायन बुकिंगा खातीर www.goa-tourism.com हे वेबसाटीचेर वयचें असोय उलो मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
