भांगरभूंय | प्रतिनिधी
मुंबय, खबरां संस्था: राज्यांत गुन्यांवकारी घडणुको वाडतूच आसात. हातूंतच मुंबय एका बारीकश्या वादांतल्यान घोवान आपले बायलेचो खून केल्ल्याची घडणूक घडली. गोरेगावांतल्या भगतसिंग नगर भागांत सोमारा सकाळीं सोर्या खातीर पयशे दिवंक नाशिल्ल्यान वसीम शेख हांणी आपले बायलेचो गळो दामून खून केलो. उपरांत २ वरांनी पुलिसांनी ताका राम मंदिर रेल्वे स्टेशन वाठारांतल्यान अटक केली. ह्या खुनाचें नेमकें कारण कितें हाचो तपास पुलीस करतात.
पुलिसांनी दिल्ले म्हायती प्रमाण, वसीम शेख आनी ताची घरकान्न गौशिया शेख (२५) ही दोगांय भगतसिंग नगरांत रावतालीं. वसीमाक सोर्याचें वेसन आशिल्लें. हाका लागून त्या दोगांय मदीं सदांच झगडें पेट्टालें. सोमारा सकाळीं सुमार साडे धा वरांचेर वसीमान सोर्या खातीर गौशिया कडेन पयशे मागले. तिणें न्हयकार दिल्ल्यान वसीमान रागान तिचो गळो दामून खून केलो.
दोन वरांनी पुलिसांनी केली अटक
खून केले उपरांत वसीम घरांतल्यान फरारी जालो. पुलिसांनी रोखडोच तपास सुरू केलो. आरोपी रेल्वे मार्गान पळून वतलो अशी म्हायती मेळटांच पुलिसांनी सांपळो लायलो. दोन वरांनी, दनपरां सुमार बारा वरांचेर आरोपी तांच्या जाळ्यांत सांपडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
