भांगरभूंय | प्रतिनिधी
भाजप अध्यक्षाक सॅम्पल आमदार म्हणप अयोग्य
पणजी: फातोड्डें मतदारसंघांत आपल्या कार्यकाळांत पुराय जाल्ले प्रकल्प दाखोवपाचे सोडून भाजप अध्यक्षाक सॅम्पल आमदार म्हणप अयोग्य आशिल्ल्याचें भारतीय जनता पक्षान म्हणलां. गोवा फॉरवर्डाचे आमदार विजय सरदेसाय हांणी केल्ल्या सॅम्पल आमदार उल्लेखाचेर भाजपान खर टिका केल्या.
दामू नायक हो फातोड्डेंचो सॅम्पल आमदार आशिल्लो. आतां तो कोण ना. हाका लागून फातोड्ड्यां उदरगती विशीं ताचे कडेन चर्चा करपाची म्हाका कसलीच गरज ना, अशें गोवा फॉरवर्डाचे आमदार विजय सरदेसाय हांणी उलोवप केल्लें. ह्या उलोवपाचेर भारतीय जनता पक्षान खर टिका केल्या.
फातोड्डें मतदारसंघांत भाजपाचो मेळावो जालो. मतदारसंघांत कितले प्रकल्प पुराय जाले, ते आमदारान सांगचें. उदरगतीचेर चर्चा करची, अशें आव्हान दामू नायक हांणी फातोड्डेंच्या आमदाराक दिल्ले. दामू नायक हो कोणूच न्ही, तो सॅम्पल आमदार असो आरोप विजय सरदेसाय हांणी केलो. ह्या उलोवपाचेर भारतीय जनता पक्षान हरकत घेतली.
दामू नायक हे दोन खेपे फातोड्डें मतदारसंघांतल्यान वेंचून आयल्यात. मतदारसंघ फेररचणुकेचो फटको तांकां बसलो. हाका लागून ते हारले. फाटले वेंचणुकेंत लेगीत तांणी 9500 परस चड मतां घेतलीं. फातोड्डें मतदारसंघांत ते पयली इतलेच लोकप्रीय आसात. तांच्या कार्यकाळांत घोगळ तळी, पूल, आयटीआय तशेंच रस्त्यांचीं खूबशीं कामां जाल्यांत. ते भारतीय जनता पक्षाचे प्रदेश अध्यक्ष आसात. विजय सरदेसाय हांणी तांचे आव्हान स्विकारून आपल्या कार्यकाळांतले प्रकल्प सांगपाची गरज आशिल्ली. तांकां सॅम्पल आमदार म्हणप हो स्वाभिमानी फातोड्डेंकारांचो अपमान आसा, अशें म्हणयारे कृष्णा साळकार हांणी सांगलें. प्रदेश अध्यक्षांचेर केल्ले आरोप पक्ष सोसचो ना, अशी शिटकावणी तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
