भांगरभूंय | प्रतिनिधी
महेश दिवेकार : शणै गोंयबाब जयंती समारोप सुवाळो दबाज्यान
कोंकणीची रोजगारा खातीर सक्ती केल्ल्यान भाशेक बरे दीस येतलेः डॉ. साळकार
दिवचल: शणै गोंयबाब हांचें कार्य व्हड. तांणी कथा, ललीत लेखां वांगडाच संशोधनात्मक लेखनूय केलें. नव्या लेखकांनी खूब-खूब वाचन करचें. डिजिटल क्रांतीचो वापर करचो आनी संशोधनात्मक लेखन करचें. खबरांपत्रां वाचप नेटान उणें जायत आसा. तरातरांचें वाचन केल्ल्यान ताचो व्हड फायदो जाता. वाचनांतल्यान स्वता निर्णय घेवप शक्य जाता. व्यक्तीमत्व सुदारता. करियराक फायदो जाता. ते खातीर भुरगेपणा सावन वाचनाची आवड आसूंक जाय अशें ‘भांगरभूंय’चे संपादक महेश दिवेकार हांणी सांगलें.
दिवचले हिराबाय झांटये सभाघरांत जाल्ल्या शणै गोंयबाब जयंती समारोप सुवाळ्यांत ते उलयताले.
ह्या वेळार डॉ. शेखर साळकार, रुपेश ठाणेकार, पूर्णानंद च्यारी अनिल सावंत, प्रशांत चणेकार, डॉ प्रवीण सावंत, विनायक गोवेकार, दत्तराज नायक माचयेर हाजीर आशिल्ले.
कोंकणी आमची आवयभास, आवयभाशेंतल्यान उलयतना वेगळेंच म्हत्व येता. ल्हानपणा सावन कोंकणीची आवड कायम आसा. गोंयकारांनी आपले आवयभाशेक विसरूंक जायना. तिचो वापर करपाक जाय. कोंकणी भाशेची रोजगारा खातीर सक्ती केल्ल्यान भाशेक बरे दीस येतले अशें डॉ. शेखर साळकार हांणी सांगलें.
अनिल सावंत हांणी सांगलें, कोंकणी परिवार वाडत आसून कोंकणीक बरे दीस येत आसात. सरकारा वतीन खूबश्या येवजण्यांचो लाव मेळत आसा. भाशा विकास येवजणेंतल्यान 80 टक्के अनुदान दितात ताचो लाव सगल्यांनी घेवचो. सरकाराच्या कोंकणी विशींच्या विवीध येवजण्यांचेर तांणी उजवाड घालो.
कोंकणीचो जागर निर्माण करपाचें कार्य शणै गोंयबाब जयंती निमतान जाता. तांचे कार्य मुखार व्हरपा खातीर सगल्यांनी योगदान दिवचें अशें आवाहन गोवा कोंकणी अकादेमीचे अध्यक्ष पूर्णानंद च्यारी हांणी केलें. जबाबदारी आसा, अधिकार दिल्यात, पूण कर्तव्य निभायलें ना जाल्यार कोंकणीक चैतन्य येवचें ना. कोंकणी डिजिटल स्टुडियो घालतले. कोंकणी भाशेच्यो विवीध बोली आसात. ते विशीं गांवांगांवांनी उत्सव करपाचो विचार आसा, अशेंय तांणी मुखार उलयतना सांगलें.
विनायक गोवेकार हांणी येवकार दिलो. प्रा. प्रवीण सावंत हांणी उपकार मानले. तन्वी पळ आनी हेरांनी सुत्रसंचालन केलें. शीतल परब हांच्या कवितांझेल्याचें प्रकाशन जालें. ह्या वेळार विवीध सर्तींतल्या जैतिवंतांक इनामां भेटयलीं. तशेंच विद्यार्थ्यांचो भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
