भांगरभूंय | प्रतिनिधी
तज्ञां वरवीं जातली चवकशी : मंत्री सुभाष फळदेसाय
भांगरभूंय । प्रतिनिधी
पणजी : मांडवी न्हंयेचेर चोडणां आनी रायबंदर मार्गार प्रवास करपी ‘बेती’ फेरीबोट सोमारा फांतोडेर बुडपाची घडणूक घडली. धक्या कुशीक नांगरून दवरिल्ली फेरीबोट रातच्या वेळार एके लवंडली आनी तातूंत उदक भरून ती बुडली. पूण वेळा काळ बरो आशिल्ल्यान फेरीबोटींतल्या कर्मचाऱ्यांनी वेळा भितर भायर सरून आपलो जीव वाटयलो, पूण तांणी उब्यो करून दवरिल्ल्यो दुचाकी मात बुडल्यो.
सदां भशेन न्हंयेंत येरादारी केले उपरांत ही फेरीबोट धक्या कुशीक लावन कर्मचाऱ्यांनी नांगरली. हे फेरीबोटीचे फुडले वटेन जंय गाडयो यो – वच करतात थंय ही बोट उफेवन उरपा खातीर दोन बुराक आसतात. ह्या बुरकांतल्यान उदक यो-वच करून फेरी उफेता. हे फेरीबोटींतलें उदक फक्त भितर वतालें तें भायर सरा नाशिल्लें. हे खातीर फेरीबोटीचे टांकयेत देंवून हातान तें उदक भायर मारचें पडटालें.
फेरीबोटीच्या तारवट्यान घडणूक विस्तारान सांगली. फेरीबोट नांगरले उपरांत कर्मचाऱ्यांनी फेरीबोटी भितर आशिल्लें उदक भायर मारलें आनी ते उपरांत न्हिदपाक गेले. पूण अचकीत पावस सुरू जालो आनी ल्हवू ल्हवू ह्या बुरकांतल्यान न्हंयेचें उदक परतून फेरीबोटींत भरपाक लागलें. फेरी मात्शी तिरकी जातकत रातच्या अडेजांक सुमार तांकां जाग आयली आनी फेरी बुडटा तें तांच्या लक्षांत आयलें. कर्मचाऱ्यांनी वेळ वगडाय नासतना उदक उस्पुपाचें काम सुरू केलें. पूण पावसाचो नेट चड आशिल्ल्यान आनी उदकाची पातळी वाडिल्ल्यान तें उदक उस्पुपाक तांकां शक्य जालें ना. देखून आपलो जीव वाटोवपा खातीर स कर्मचारी फेरीबोटींतल्यान भायर सरले, पूण तांच्यो तीन मोटारसायकली थंयच उरल्यो, अशें तारवट्यान सांगलें.
फेरीबोटींतल्यान भायर सरले उपरांत आमी न्हंय येरादारी खात्यांक हे विशींची कळयलें आनी तांणी आमकां पुलीस आनी उजो पालोवपी दळा कडेन संपर्क करपाक लायलो. उजो पालोवपी दळाक कळयले उपरांत ते रोखडेच घडणूक सुवातेर पावले, अशें तारवट्यान सांगलें.
उजो पालोवपी दळान वेळ काडिनासतना उच्च तांकीचे पंप बसयले आनी फेरीबोटींतल्यान सगलें उदक भायर काडलें आनी फेरीबोट आसली तशी उबी केली. कर्मचाऱ्यांच्यो दुचाकी उदका पोंदा गेल्ल्यो तो सगळ्यो भायर काडपाक तांकां येस फावो जालें.
उपरांत न्हंय येरादारी मंत्री सुभाष शिरोडकार हांणी घडणूक थळार भेट दिवन परिस्थितीचो नियाळ घेतलो. तांणी हे घडणुके विशीं कर्मचाऱ्यां कडेन चर्चा केली.
ही घडणूक घाळपणाक लागून घडल्या वा तांत्रीक त्रुटीक लागून हे विशींची तंज्ञा वरवी चवकशी करतले अशें फळदेसाय हांणी सांगलें.
फेरीबोट ही उफेवन उरची म्हूण फेरीबोटी भितर पोकळ टांकयो आसतात. पावसा वेळार उदकाची पातळी वाडून हें उदक त्या टांकयांनी वचपाची शक्यताय आसात. पूण ही फेरीबोट नांगरले उपरांत पावस – वाऱ्यान ती भरकटली आनी ह्या टांकयांनी उदक वचपाची शक्यताय आसा, अशें फळदेसाय हांणी सांगलें. कोणाच्या घाळपणाक लागून वा तांत्रीक अडचणीक लागून हें घडलां तें कळटले. हें उदक टांकयांनी गेले उपरांत ते आपल्या आपूण भायर सरपाक जाय आसलें. पूण तें भायर कित्याक सरूंक ना हाचें कारण सोदपाक जाय. पयलेच खेपे अशी घडणूक घडल्या. आतां हे विशीं चवकशी करपा खातीर तज्ञ नेमतले आनी प्रवाशांचे सुरक्षे विशीं उपाय येवजण हातांत घेतले, अशें फळदेसाय हांणी सांगलें.
घडणुके वयल्यान विरोधकांची टिका
गोंय प्रदेश काँग्रेसीचे प्रदेशाध्यक्ष अमीत पाटकार हांणी सरकारचेर टिका करतना म्हणलें, ही घडणूक गोंयचे न्हंय येरादारी वेवस्थेचें अपेस आनी भाजप सरकारच्या घाळपणाची व्हडली देख आसा. हे घडणुकेंत जर कोणाचो जीव गेल्लो जाल्यार ताची जापसालदारकी कोण घेवपाचो? ही फक्त घाळपणां न्हय, जाल्यार गुन्यांवकारी स्वरुपाची गजाल आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
