भांगरभूंय | प्रतिनिधी
देशांतले वेंचणूक यंत्रणे विशीं सेगीत दुबाव उक्तायत विरोधकांक आनी तातूंतलें तातूंत काँग्रेस पक्षाक जें साध्य करपाचें आसा तातूंत तांकां कितले मेरेन यश येतलें हाचो दुबाव आसलो तरी राहुल गांधी आनी कंपनीक मात आपलें सदचेंच पिरपिरें थांबाेवन वेगळें कितें करचें अशें दिसून येना हें परतून एकदां सिद्ध जालें. वेंचणुकेचो व्हिडियो फुटेज मतदान जाले उपरांत 45 दीस जावन वतकच नश्ट करपाचो केंद्रीय वेंचणूक आयोगाच्या ताज्या निर्णयाक लागून नवो संग्राम सुरू जाला, आनी काँग्रेस फुडारी राहुल गांधी आनी हेर कांय फुडाऱ्यांनी आदींच्या तांच्या रडगाण्याक नवो सूर दिवन आयोगाक वेठीक धरपाचो नव्यान यत्न सुरू केला. बिहार तशेंच हेर कांय राज्यांनी हालींच्या काळांत जावपी विधानसभा वेंचणुकांचे फाटभुंयेर राहुल गांधी आनी तांचो काँग्रेस पक्ष वेंचणूक यंत्रणे आड आवाज काडीत मतदारांक सामकार वचपाच्या यत्नांत आसा. काँग्रेसी कडल्यान आनी चड करून राहुल गांधी हांणी केल्ल्या आरोपांक वेंचणूक आयोग दर फावटी जाप दीत आसलो तरी हो खेळ थांबोवपाची तांची तयारी दिसून येना. आतांय वेंचणुकेच्या व्हिडियो फुटेजी विशीं वेंचणूक आयोगान दिल्ल्या ताज्या निर्णया वेल्यानूय तांकां घेरपाचो विरोधकांनी विडो उबारिल्लो दिसता. पूण आयोगान ते विशीं जो खुलासो करून घेतिल्ल्या निर्णया फाटलीं कारणां स्पश्ट केल्यांत ती पळयत जाल्यार हो खेळ आतां थांबोवप हेंच राहुल गांधी आनी कंपनी खातीर योग्य थारुये.
वेंचणुकेंतल्या मतदाना कडेन संबंदीत व्हिडियो फुटेज 45 दिसां उपरांत नश्ट करप ह्या वेंचणूक आयोगाच्या ताज्या निर्णयान आतां हो नवो वाद सुरू जाला, आनी आयोग निश्पक्षपणान वेंचणुको घेनात हे खातिरूच ताचे पुरावे कोणाच्याच हाताक लागचे न्हय हे खातीर ही चाल आशिल्ल्याचो नवो आरोप राहुल गांधीन आयोगाचेर करून तांकां आरोपीच्या पांदऱ्यांत उबे करपाक तयार जाल्यात. वेंचणूक आयोगान काँग्रेसी कडल्यान जायत आशिल्ले आरोप खोडून काडटना समर्पक रितीन खुलासो केला. वेंचणुके कडेन संबंदीत सीसीटीव्ही वा व्हिडियो फुटेज भौशीक करप म्हणल्यार मतदारांच्या गोपनियतीचें उल्लंघन थारता अशें वेंचणूक आयोगान म्हणलां. ताका कायदेशीर आधार कसो आसा हाचीय म्हायती आयोगान दिल्ल्यान राहुल गांधी आनी कंपनी जे आरोप करीत आसात तातूंत कांयच तथ्य नाशिल्ल्याचें स्पश्ट जालां. मतदाना कडेन संबंदीत व्हिडियो फुटेज चड काळ संग्रही दवरप म्हणल्यार ती लीक जावपाची चड भिरांत आसता आनी अशी फुटेज भौशीक जाली जाल्यार तातूंतल्यान मतदारांची स्पश्ट वळख जावंक शकता ही गजाल विचारांत घेवनूच हो निर्णय घेतिल्ल्याचो दावो वेंचणूक आयोगान केल्ल्यान ताचें म्हत्व अधोरेखीत जालां. मतदानाची फुटेज भौशीक करप म्हणल्यार जे घात उप्रासूंक शकतात ते विशींय आयोगान स्पश्टीकरण केलां.
वेंचणूक जाले उपरांत देड म्हयन्यांनी मतदाना कडेन संबंदीत सीसीटीव्ही, वेबकास्टिंग आनी वेंचणुकेचे व्हिडियो नश्ट करपाचो आदेश वेंचणूक आयोगान आपल्या अधिकाऱ्यांक दिल्यात. ताचे फाटलें कारण अशें की ही फुटेज कोणाच्याय हातक लागत जाल्यार मतदान करपी आनी न करपी हांची वेगळी वळेरी तयार करप शक्य आसा आनी तातूंतल्यान भलत्योच समस्या निर्माण जावंक शकतात अशेंय आयोगाक दिसता. जाका लागून भेदभाव, धमक्यो, प्रलोभनां बराबरूच मतदारांच्या जिविताकूय घात निर्माण जावंक शकता. मतदान न करपाचो जांणी निर्णय घेतला आसत जाल्यार तांचे विशींय गोपनियतीचें तें उल्लंघन थारूंक शकता असोय दावो आयोगान केला. वेंचणुके कडेन संबंदीत फुटेज एक वर्सां मेरेन संग्रही दवरिनासतना 45 दिसां भितर नश्ट करपाचो निर्णय म्हणल्यार जांचे कडल्यान न्यायाची अपेक्षा करची तांणीच पुरावे नश्ट करपा सारकें आसा असो आरोप राहुल गांधी हांणी केल्ल्यान वेंचणूक आयोगा कडल्यान हो खुलासो केल्ल्याचें दिसता. राहुल गांधी आपल्या आरोपांत मुखार अशेंय म्हणटात की मॅच फिक्स जाल्या आनी वेंचणूक फिक्स जावप म्हणल्यार लोकशाये खातीर तें विखूच थारता. राहुल गांधी हांची विचार करपाची पद्दत तशी अजबूच आसून देशाकूय ती आतां बरे पैकीं -वळखीची जाल्या. आतां तांच्या ह्या नव्या खेळीक लागून कितेंय साद्य जातलें अशें मानपा सारकी परिस्थिती नासली तरी वेंचणुकेच्या तोंडार अशें कितेंय चित्रविचित्र वागप हें आतां काँग्रेसीच्या फुडाऱ्यां खातीर नित्याचेंच जालां असोच समज करून घेवन ताचे कडेन आडनदर करप होच ताचेर पर्याय आसूंक शकता.
वेंचणुकेची व्हिडियो फुटेज भौशीक करप म्हणल्यार लोकप्रतिनिधी कायदो आनी सर्वोच्च न्यायालयाच्या आदेशाचें उल्लंघन थारता. लोकप्रतिनिधी कायदोय मत न दिवपाच्या एखाद्या मतदाराच्या अधिकाराक मान्यताय दिता हेंवूय हांगा लक्षांत घेवंक जाय आनी तशें आसत जाल्यार उठसूट वेंचणूक आयोगाच्या माथ्यार पक्षपातीपणाचें खापर फोडपाक खंयचें शाणपण आसा हाचोय विचार जावंक जाय. वेंचणुकेचो व्हिडियो भौशीक करप म्हणल्यार 17ए फॉर्म उपलब्ध करून दिवपा सारकेंच आसा अशेंय जेन्ना आयोग सांगता ताचें तरी भान दवरूंक जाय. पूण तशें जातना दिसून येना. आतां हे खातीर देड म्हयन्याची जी मर्यादा दवरल्या ती ह्या सगल्या गजालींचो सारासार विचार करूनच दवरल्या हें स्विकारूंक जाय.
सत्ताधारी पक्ष वेंचणूक यंत्रणेचो वापर करून गैरमार्गान सत्ता हातासता असो आरोप करतना आपूण प्रामाणीकपणान मतदानाचो हक्क बजावपी मतदारांचोय अपमान करता हाचें भानूय निदान राहुल गांधी वा हेर विरोधकांनी दवरूंक जाय. महाराष्ट्र विधानसभा वेंचणुकेंत भाजप आनी इश्ट पक्षांक मेळिल्ले घसघशीत येस अजूनय काँग्रेसीक पचिल्लें ना होच अर्थ हातूंतल्यान काडूं येता. संवसारांतली सगल्यांत व्हड लोकशाय म्हणून भारताचो भोवमान जायत आसतना आमचे वेंचणूक यंत्रणेचेर सेगीत अविस्वास दाखोवन काँग्रेसीक नेमकें कितें साध्य करपाचें आसा हें कळपाक मार्ग ना. वेंचणूक आयोगानूय एकदांची एक सणसणींत बडी मारून हो वाद निकालांत काडप ही काळाची गरज आसा.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
