भांगरभूंय | प्रतिनिधी
ट्रम्पाचो ‘गॅम्ब्लर’ असो उल्लेख करून बदलो घेवपाचो सोपूत
खबरां संस्था
नवी दिल्ली : इराणान अमेरिकेक जश्याक तशी जाप दिल्या. इराणान कतार आनी इराकांतल्या अमेरिकेच्या तळांचेर हल्लो केलो. कतारची राजधानी दोहांत स्फोटांचो आवाज आयकुपाक आयलो. इराणी सैन्यान कतारांतल्या अमेरिकेच्या तळांचेर 9 क्षेपणात्रांनी हल्लो केलो. दोहांतल्या हवाई क्षेपणास्त्र प्रणाली इराणी क्षेपणास्त्रां आडावपाचो यत्न करतात. इराकांत इराणाचें बॅलिस्टीक क्षेपणास्त्र आडायलें. रातीं उसरां कुवेट आनी बहरीनांतूय अलर्ट जारी केला.
फाटल्या कांय दिसां सावन चालू आशिल्ल्या इराण – इझ्रायल लश्करी संघर्शांत आतां अमेरिकेन पावल मारलां. इराणाच्या अणू प्रकल्पांचेर हवाई हल्ले केल्यात. अमेरिकेच्या ह्या हल्ल्यांचेर संवसारभरांतल्यान प्रतिक्रिया येवपाक लागल्यात. इराणान लेगीत अमेरिकेच्या ह्या हल्ल्यांक परतून जाप दितले अशें म्हणलां. इराणाच्या लश्करी म्हणयाऱ्यान सोमारा अमेरिकेक खर शिटकावणी दिल्या. अमेरिकेच्या हल्ल्यांक लागून इराणा कडेन कायदेशीर हल्ले करपाचे पर्याय वाडल्यात, अशें एका व्हिडियो निवेदनांत तांणी म्हणलां.
इराणच्या खातम अल – अंबिया केंद्रीय लश्करी मुख्यालयाचे म्हणयारे इब्राहीम झोलफकारी हांणी म्हणलां, अमेरिकेक तांचे कृतीचे गंभीर परिणाम भोगचे पडटले. ह्या वेळार तांणी अमेरिकेचे राष्ट्राध्यक्ष डोनाल्ड ट्रम्प हांचो ‘गॅम्ब्लर’ असो उल्लेख करून बदलो घेवपाचो सोपूत घेतलो.
झोलफकारी हांणी तांच्या व्हिडियो निवेदनाच्या निमाणे कडेन इंग्लिशेंत म्हणलां, गॅम्ब्लर ट्रम्प, हें झूज तुमी सुरू केला आसत, पूण तें सोंपोवपी आमीच.
मजगतीं, इराणाच्या लश्करान आदींच सांगलां, तें तांच्या अणू प्रकल्पांचेर अमेरिकेन केल्ल्या हल्ल्यांक परतून जाप दितले.
हे आदीं एका निवेदनांत संयुक्त राष्ट्रांतले इराणाचे राजदूत अमीर सईद इरावनी हांणी म्हणलां, फोर्डो, नतान्झ आनी इस्फहान अणू प्रकल्पां वयल्या अमेरिकेच्या हल्ल्यांक केन्ना आनी कसी जाप दिवपाची तें इराणी सैन्य थारायतलें.
मजगतीं, अमेरिकेचे राष्ट्राध्यक्ष डोनाल्ड ट्रम्प हांणी दावो केला, इराणाच्या अणू प्रकल्पांचेर केल्ल्या हल्ल्यांक लागून इराणाचें व्हड लुकसाण जालां. ट्रम्प हांणी जर असो दावो केलो तरीय उपगिरो फोटवांनी इराणाच्या अणू प्रकल्पांचें कितलें लुकसाण जालां, हें अजून स्पश्ट जावंक ना. तेच वांगडा खूबश्या तज्ञांच्या म्हणण्या प्रमाण इराणान अणू प्रकल्पांतलें युरेनियम हवाई हल्ल्यांच्या आदींच थंयच्यान दुसरे कडेन व्हरून अमेरिका आनी ट्रम्प हांकां पिश्यांत काडला आसुंये.
ह्या हल्ल्यां उपरांत इराणान कसलोच बदलो घेवपाचो यत्न करचो न्हय. इराण सरकारान आतां शांतताय प्रस्थापीत करची. ना जाल्यार फुडारांतले हल्ले खूब व्हड आसतले, अशें ट्रम्प हांणी म्हणलां. तांच्या ह्या विधानाक लागून मध्य पुर्वेंतलो संघर्श आनीक वाडपाचो हुस्को आसा. अमेरिकेन इराणाच्या तीन अणू प्रकल्पांचेर बंकर – बस्टर बॉम्ब आनी दोन डझनां परस अदीक टोमाहॉक क्षेपणास्त्रां सयत हल्लो केलो, अशें जॉयंट चीफ ऑफ स्टाफाचे अध्यक्ष जनरल डॅन केन हांणी पत्रकारांक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
