भांगरभूंय | प्रतिनिधी
म्हापशें : गोंय सरकाराच्या भौशीक बांदकाम खात्यांतल्या वरिश्ठता वळेरेंत पक्षपात करून ऍडहॉक अभियंत्यांक बेकायदेशीरपणान बढती दिल्या. हातूंत दिवपा-घेवपाचो प्रकार घडला. ह्या पुराय प्रकरणाची मुख्यमंत्र्यांनी खोलायेन चवकशी करची, अशी मागणी उबाठा शिवसेनेचे राज्य मुखेली जितेश कामत हांणी केली.
ऍडहॉक अभियंत्यांक बढती रद्द करून पात्र आनी आडनदर केल्ल्या १४ अभियंत्यांक बेगोबेग बढती दिवची. आठ दिसांनी भौशीक बांदकाम खातें आनी सरकारान हो प्रस्न सोडयल्यार उच्च न्यायालयांत जाप मागतले, अशी शिटकावणी कामत हांणी दिली.
सोमार म्हापश्यां आयोजीत पत्रकार परिशदेत ते उलयताले. ह्या वेळार मेहबूब मेलबन, प्रतिक शिरोडकार आनी रेशद डिसोझा हे शिवसेना पदाधिकारी हजर आशिल्ले.
कामत हांणी, भौशीक बांदकाम खात्यांतले कनीश्ठ अभियंते आनी तांत्रिक सहाय्यक अशा ९८ अधिकार्यांक हालींच सहाय्यक अभियंता पदार बढती दिल्या. तांतल्या ४९ जाणांक नेमान सेवेंत जाल्यार ४९ ऍड-हॉक सेवेंत बढती दिल्या. आमचो नेमान आशिल्ल्या कर्मचार्यांचे पदोन्नतीचेर कसलोच आक्षेप ना. मात ऍडहॉक अधिकारी बढतेक खर आक्षेप आसा. कारण आपल्या मर्जेंतल्या आनी विशिश्ठ मनशां खातीर कांय जाणांक तांच्या न्यायीक बढतींतल्यान आड नदर केल्या.
हे बढते पसून एका स्वातंत्र्य सैनिकाच्या पुता कडेनूय आडनदर जाल्या. सेवा ज्येष्ठताय वळेरेच्या आधारार ऍड-हॉक कर्मचार्यांक़ बढती दिवपाक मेळना. हाका लागून सहाय्यक अभियंता पदांवेल्या सगल्या हंगामी अभियंत्यांची बढती रद्द करची. हे बढते खातीर एके बायले वरवीं दिवप-घेवप जाल्ल्याचो दुबाव आसा. हे बेकायदेशीर बढती प्रकरणाची उच्च पांवड्यार चवकशी करची, अशी मागणीय कामत हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
