भांगरभूंय | प्रतिनिधी
पणजी : धारबांदोडचे स्पिडब्रेकर काडपाचे पंचायतीचे कागाळी प्रकरणांत मानवाधिकार आयोगान भौशीक बांदकाम खात्याच्या प्रधान मुख्य अभियंत्यांक नोटीस जारी केली. २४ जुनाक आयोगा मुखार जावपी सुनावणे वेळार प्रधान मुख्य अभियंत्यांक बाजू मांडची पडटली.
मानवाधिकार आयोगाचे अध्यक्ष डेस्मंड डिकोस्ता आनी वांगडी प्रमोद कामत हांणी नोटीस जारी केल्या. फाल्यां सकाळीं जावपी सुनावणेक प्रधान मुख्य अभियंते वा तांच्या कायदेशीर प्रतिनिधीक सुनावणेक हजर रावचें पडटलें.
धारबांदोडेंचे सरपंच विनायक गांवस हांणी भौशीक बांदकाम खात्या आड मानवाधिकार आयोगाकडेन कागाळ केली. धारबांदोडा पंचायत वाठारांत अपघातांचें प्रमाण वाडटा. जायत्या वर्सां आदीं चलत वचप्यां खातीर आनी हेरांचे सुरक्षितताये खातीर रस्त्याचेर स्पिडब्रेकर घातले. हे स्पिडब्रेकर काडपाक भौशीक बांदकाम खात्यान सुरू केलां. पंचायत तशेंच हेर कोणाकूच विस्वासांत घेनासतना स्पिडब्रेकर काडपाची प्रक्रीया सुरू केल्ल्याची कागाळ सरपंचांनी आयोगाकडेन केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
