भांगरभूंय | प्रतिनिधी
माशेल: पोरणें गोंयच्या रेल्वे जंक्शनाचेर उड्डाण पुलाचें काम नेटान करचे खातीर २३ जून सावन धेंपो मैदान ते फिशरीज ऑफिस मेरेन रस्तो बंद दवरतले अशें सांगिल्लें. आयच्यान कुंभारजुवे, गंवडाळी पुलाच्या मार्गान सांतईस्तेव्ह, माशेल, आमोण्यां, सांखळे, वाळपयच्यान येवपी वाहनचालकांची येरादारी गंवडाळेच्यान खोर्ले उद्देगीक वसणुकेच्या मार्गान वळयिल्ली. मात हो रस्तो अशीर आशिल्ल्यान आनी त्या रस्त्यार दोन वाहनां एकामेकांक रस्तो करून दितना येरादारी कोयंडी जाली. तशेंच लोकांक बरेच त्रास सोंसचे पडले.
लोकांक जावपी समस्या लक्षांत घेवन आमदार राजेश फळदेसाय हांणी ह्या प्रकरणांत रोखडेंच लक्ष घालून नवो पर्याय उपलब्ध करून वाहनचालकांक आनी रेल्वे जंक्शन वाठारांतल्या नागरिकांक थाकाय दिल्या.
आमदार राजेश फळदेसाय हांणी पोरणें गोंय रेल्वे जंक्शन मार्ग सकाळचीं ८ ते १० वरां मेरेन आनी सांजेवेळार ५ ते रातच्या ९ वरां मेरेन येरादारी खातीर उक्तो आसतलो. हो पोरणें गोंयचो रेल्वे जंक्शन रस्तो सकाळीं १० ते सांजेवेळार ५ वरां मेरेन बंद उरतलो. हाची वाहनचालकांनी आनी रेल्वे जंक्शन वाठारांतल्या नागरिकांनी नोंद घेवची असो उलो आमदार फळदेसाय हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
