भांगरभूंय | प्रतिनिधी
नवी दिल्ली, खबरां संस्था ः संयुक्त राश्ट्रांच्या संवसारीक लोकसंख्या धोरण अहवाला प्रमाण भारतांत प्रजनन दर उणो जायत आसा. अहवाला प्रमाण भारताची लोकसंख्या 2025 वर्साच्या निमाणे मेरेन 1.46 कोटी मेरेन पावूं येता असोय अदमास काडला. पूण प्रजनन दर 1.9 मेरेन देंवला. लोकसंख्येचो अहवाल आयले उपरांत जायत्या म्हत्वाच्या प्रस्नांचेर भर दिलो. लोकसंख्या नियंत्रण, प्रजनन प्रमाण उणें जावप, गुरवारपणांत बायलांची भलायकी, कुटुंब नियोजनाचेर ताण, तरणाटे आनी जाण्टे लोकांचो आंकडो आनी हेर जायत्यो गजाली हांचे विशीं सत्य परिस्थिती उक्ती जावपाक लागल्या.
हालींच जाहीर जाल्ल्या युएनएफपीए अहवालाचेर आनी ताचे भोंवतणीं आशिल्ल्या कांय प्रस्नांचेर भारतीय कुटुंब नियोजन संघटनेची खाशेली कार्यकारी अधिकारी डॉ. कल्पना आपटे हांणी आपले मत उक्तायले. आमची लोकसंख्या वाडत रावची ना. सध्याच्या जोडप्यां मदीं भुरगीं नाका वा फकत एकूच भुरगें अशी मानसिकताय वाडत आसा. देखून हाचो लोकसंख्येचेर रोखडोच परिणाम जावचो ना. ताचो परिणाम कांय वर्सां उपरांत दिसतलो. देखून आतां जें प्रजनन प्रमाण उणें जायत आसा ताचो परिणाम सुमार 20 ते 30 वर्सां उपरांत दिसतलो. हाचें कारण जोडप्यांची मानसिकताय आसूं येता. बायलां शिक्षीत जाली तशीं तशीं एकूच भुरगे वा फकत दोन भुरगीं हे विशीं मानसिकताय वाडत गेली. प्रजननाचे प्रमाण उणें जायत आसा. कारण, जोडप्यांक तांच्या मर्यादीत साधनसंपत्तीची जाणविकाय आसता. भुरगें जल्मल्या उपरांत त्या एका भुरग्याक सगळें दिवपाच्या हेतान चड भुरगीं नाका हो पर्यायय स्विकारतात.
तरणाटे आनी ज्येश्ठ नागरिक
फुडल्या 10 ते 20 वर्सांत लोकसंख्येंत ज्येश्ठ नागरिकांचो आंकडो वाडटलो. जाण्ट्यांचो आंकडो चडांत चड आसतलो. तांच्यो गरजो, तांकां जाय आशिल्ली वैजकी मजत वा कुटुंबाची मजत लक्षांत घेवप गरजेचें. ज्येश्ठ नागरिकां खातीर पुराय वेवस्था स्थापन करपाची गरज आसा. ज्येश्ठ नागरिकां खातीर सरकारी येवजण्यो आसात. पूण सद्याची लोकसंख्या मतींत घेतल्यार त्या येवजण्यांनी आनीक सुदारणा करपाची गरज आसा. आतां तरणाट्यांचो आंकडो चड जातलो आनी प्रजनन दर उणो जातलो. हाचोच अर्थ फुडल्या २० ते ३० वर्सांत तरणाट्यांचो आंकडो उणो जातलो आनी ज्येश्ठ नागरिकांचो आंकडो वाडटलो. अशा वेळार त्या लोकसंख्येंत उतार-चढाव नक्कीच जातले.
खंयच्या राज्यांत चड लोकसंख्या
० 2011 वर्साचे जनगणने प्रमाण, उत्तर प्रदेश आनी बिहार हीं दोन व्हड राज्यां, जंय सगळ्यांत चड भुरगीं जल्मतात.
० अहवाला प्रमाण 2022 वर्सा भारतांत सुमार 2.5 कोटी भुरगी जल्मली.
० उत्तर प्रदेशांत सगळ्यांत चड 5.45 लाख जल्मांची नोंद जाल्या.
० बिहारांत 30.7 लाख, महाराष्ट्रांत 19.2 लाख जल्मांची नोंद जाल्या. मध्य प्रदेश आनी राजस्थानांतय जल्म नोंदणीचें प्रमाण चड आसा.
० दक्षीण राज्यांनी 2022 वर्साच्या तुळेन उणीं जल्म नोंदणी नोंद जाल्या.
० तमिळनाडूंत 9.4 लाख, तेलंगना 7 लाख, आंध्र प्रदेशांत 7.5, कर्नाटकांत 10.4 लाख, केरळांत फकत 4.4 लाख जल्म नोंदणी जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
