भांगरभूंय | प्रतिनिधी
मडगांव : वेंचणूक जिखप वा हारप हें त्या वेळावेल्या राजकारणाचे रचणुकेचेरूय निंबून आसता. तातूंत कोणाचीच तुळा जावपाक शकना. आमदार जाले उपरांत मतदारसंघांत खंयचीं कामां केल्यांत हाचेर तुळा जायतूच आसता. शेतकारांक जमनी परत करपाचें आस्वासन दिवन आपणें फटींगपणां करूंक ना, अशें सांगीत भाजप प्रदेशाध्यक्ष दामू नायक हांणी सिग्नेचर प्रकल्प दाखोवपाचें आव्हान आजूनय कायम आशिल्ल्याचें म्हणलें.
मडगांव रवींद्र भवनांतले कार्यावळी उपरांत प्रसारमाध्यमां कडेन उलयतना भाजप प्रदेशाध्यक्ष दामू नायक हांणी कामांच्या मोलादीक चर्चे खातीर आजूनय तयार आसा. लोकांची दिकाभूल करपाचो यत्न नाका, अशें सांगलें.
मतदारसंघांची पुनर्रचणूक जाली आनी फातोड्ड्यां मतदारसंघांतल्या कांय भागांचो कुडतरी आनी कांय भाग मडगांव मतदारसंघांत आसपाव जालो. अल्पसंख्याक आनी भोवसंख्याक हातुंतल्या गणितांतूय हांवें मतां मेळयिल्ल्यान हातूंत दर वेळा वाड जाल्या. अल्पसंख्याक समाजाच्या मतदारसंघात जशें नुवें, कुडतरी, बाणावले, वेळ्ळीत भाजप पावूंक शकलें ना, कारण थंयच्या समाजाक समजावपाक आमी उणे पडल्यात. अल्पसंख्यांक जर चड आसत जाल्यार लेगीत फातोड्डेंच्यान पळून वचनातना वेंचणुकेक बसलों. तिनूय वेंचणुकांनी मतांनी वाड जाल्या, अशें स्पश्ट केलें.
भाजप मेळाव्या वेळार फातोर्डा मॉडेल पळोवपा खातीर येता अशें वक्तव्य केल्यार ही उदरगत आमदारान करूंक ना, सरकारान केला. आदल्या आमदारान विकासकामांची केल्ली फाटपुरवणय तितलीच आसा. दुसर्याच्या कामांचें श्रेय आपणें केन्नाच घेवंक ना. मात, आतांचे आमदार फातोड्ड्यां नाशिल्लो प्रकल्प व्हिडिओंत दाखोवन श्रेय घेतात. वेस्टर्न बायपास पुलाची मागणी बंगल्यांत उदक येतलें म्हणून केल्ली. कायम असत्य सांगून तें सत्य जावपाक शकना.
फातोड्ड्यां विशीं योग्य वेळार योग्य भुमिका घेतलों
भाजपचो प्रदेशाध्यक्ष ह्या नात्यान कार्यकर्त्यांक उबार दितना सगल्या मतदारसंघांनी मेळावो करप हें आपलें काम. फातोड्ड्यां आपल्याक सदांच उमेदवारी आसतली अशें ना. योग्य वेळार आल्याचेर योग्य भूमिका घेतले, अशें सांगतनाच शेतकारांच्यो जमने परत दिवपाचें आस्वासन जांणी दिलें तांणी सत्तेंत आसतनाय तें पुराय करूंक ना, अशीं टिका भाजप प्रदेशाध्यक्ष दामोदर नायक हांणी आमदार सरदेसाय हांचेर केली.
मंत्री जाले उपरांत आस्वासनां कित्याक पुराय करूंक ना?
फातोड्डेंच्या शेतकारांक शेत जमनी परत करतले अशें आस्वासन आपणें दिवंक ना. तें विजय सरदेसाय हांणी दिलां. उपरांत ते सरकारांत आशिल्ले, उपमुख्यमंत्री जाले, दोन सहकारी मंत्री जाले तेन्ना तांणी शेत जमनी कित्याक परत करूंक ना, असो प्रस्न दामू नायक हांणी सरदेसाय हांकां केलो. आपणें कितेंय बेकायदो आसल्यार आवाज केलो, मात वयक्तीक टिका केन्नाच करूंक ना, अशें तांणी मुखार सांगलें.
जमनी पोंदच्यान लायटीच्यो सरयो, घाणयार्या उदकाचीं पायपां, ११ व्हाळांची बांदणी, आर्लेम ते रवींद्र भवन रस्त्या खातीर भूअधिग्रहण, घोगळांत तळें अशे प्रकल्प केन्ना सुरू जाले हाची म्हयती घेवची. नवे पिळगेक फाटलीं वीस वर्सां कितें जालें हाची कांयच म्हायती दिनासतना दिकाभूल करतात. आतां आपूण उलयलों तेंय सध्याचे पिळगेक उदरगतीचीं कामां कोणें केलीं आनी नव्या प्रकल्पांची पायाभरणी कोणें केली हे समजपा खातीर केलें, अशेंय दामू नायक हांणी सांगत आमदार सरदेसाय हांणी दुसर्यांच्या कामांचें श्रेय घेवचें न्हय असो सल्लो तांणी दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
