भांगरभूंय | प्रतिनिधी
ऋषभ पंताच्या (134) आक्रमक शेंकड्या उपरांत लेगीत इंग्लंडाच्या बॉलरांनी शिस्तीन बॉलींग करून भारताचो पयलो डाव 471 धांवड्यांचेर सोंपयलो. बेन स्टोक्सान 66 धांवड्यो दिवन चार आनी जोस टंग हाणें 86 धांवड्यो दिवन 4 विकेटी घेतल्यो.
अखेरची खबर मेळिल्ली त्या वेळार इंग्लंडान आपल्या डावांत 2 विकेटी व्हगडावन 154 धांवड्यो केल्ल्यो. दोनूय विकेटी फास्ट बॉलर जसप्रीत बुमरान घेतल्यो.
ते पयलीं शुभमन गिल, यशस्वी जयस्वाल आनी ऋषभ पंत हांच्या शेंकड्यां नेटार व्हड धांवसंख्या उबारपाचे वटेन वचपी भारताक पयल्या सत्रांत जबरदस्त धपके बसले. जेवणाच्या विसवाक 20 मिनटां बाकी आसतना भारताचे एका फाटल्यान एक अशे मदले फळयेंतले चार बॅट्समन बाद जाले. भारताचो डाव गुठलावपाक स्टोक्स आनी टंग हांची मुखेल भुमिका आशिल्ली. सकयल्या पांच बॅट्समनांक दोट्टी आंकडो लेगीत हुपपाक जमलो ना. आठ वर्सांनी राष्ट्रीय पंगडांत पुनरागमन करपी करुण नायराक खातें लेगीत उगडपाक जमलें ना.
ते आदीं सकाळीं भारतान 3 बाद 359 धांवड्यां वयल्यान मुखार खेळपाक सुरवात केली. मुखेली गिल आनी पंत हांणी भारताक बरी सुरवात करून दिली. दोगांयनी मैदानाच्या चारूय वटेन आकर्शक शॉर्ट मारले. दोगांयचो खेळ पळयलो जाल्यार भारत व्हड धांवसंख्या उबारतलो अशें दिशिल्लें. मजगतीं, पंतान कारकिर्दींतलो सातवो शेंकडो मारलो. इंग्लंडाक काल पयलें येस गिलाच्या रुपान मेळ्ळें. जेवणाच्या विसवाक 20 मिनटां बाकी आसतना स्पिनर शोएब बशीर बॉलिंगेक आयलो. ताका सको मारपाच्या यत्नांत गिल डीप बॅकवर्ड स्कॅवर लेगांत उबो आशिल्ल्या टंग हाका कॅच दिली. गिलान 227 बॉलांनी 147 धांवड्यो केल्यो. हातूंत 19 चवके आनी एका सक्याचो आस्पाव आशिल्लो. गिल बाद जाल्या उपरांत करुण नायर स्टोक्साच्या बॉलाचेर एक्स्ट्रा कव्हरांत कॅच दिवन परतलो. दुसरे वटेन आक्रमक बॅटींग करपी पंताक जोश टंगान शांत केलो. पंतान 12 चवके आनी स सके मारले.
जेवणाक कांय मिनटां बाकी आसतना भारताक शार्दुल ठाकुराच्या रुपान (1) सातवो धपको बसलो. स्टोक्सान ताका बाद करून डावांतली चवथी विकेट मेळयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
