भांगरभूंय | प्रतिनिधी
लक्ष्मण गांवस: भुयपाल सरकारी माध्यमीक विद्यालयांत विद्यार्थ्यांचो भोवमान
वाळपय: विद्यार्थ्यांची तोखणाय करप गरजेचें. अशें केल्ल्यान तांचे मदीं नवी उमेद निर्माण जाता. ताका लागून समाजाच्या दरेका घटकान विद्यार्थ्यांक विंगड विंगड मळार प्रोत्साहन दिवचें, अशें आवाहन सत्तरी अर्बन कॉपरेटिव्ह क्रेडीट सोसायटीचे कार्यकारी संचालक लक्ष्मण गांवस हांणी केलें. भुयपाल सरकारी माध्यमीक विद्यालयाच्या धावी परीक्षेंत पास जाल्ल्या गुणेस्त विद्यार्थ्यांचे भोवमान कार्यावळीक ते मुखेल सोयरे म्हणून उलयताले. माचयेर विद्यालयाची मुख्याध्यापिका मोनाली नायक, शाळा वेवस्थापन समितीची अध्यक्ष कल्पना गांवकर आनी हेर हाजीर आशिल्ले.
लक्ष्मण गांवस हांणी, सत्तरी म्हालाच्या प्रत्येक सरकारी माध्यमीक विद्यालयाचो शिक्षणीक निकाल बरो आयला. ताका लागून शिक्षकांची मेहनत आनी पालकांच्या सहकार्याक लागून गांवगिर्या वाठारांतली शिक्षणीक उदरगत जातली, अशें म्हणीत तांणी समाधान उक्तायलें.
विद्यालयाची मुख्याध्यापक मोनाली नायक हांणी, भुयपाल सरकारी माध्यमीक विद्यालयांत येवपी विद्यार्थ्यांचे पालक सक्रीय आनी सहकार्य करपी आसात. ताका लागून विद्यालयांत निर्माण जावपी खूबश्यो आडखळी पयस करपाचे नदरेन पालकांनी आतां मेरेन बरें सहकार्य केलें. शाळांनी आयोजीत केल्ल्या दरेका उपक्रमांनी भुरग्यांनी स्वता वांटेकार जावचें अशें आवाहन तांणी केलें.
परंपरीक दिवली पेटोवन कार्यावळ सुरू जाली. माचयेर हाजीर आशिल्ल्या मानेस्तांक फुलांचो तुरो भेटोवन येवकार दिलो. माचयेर हाजीर आशिल्ल्या मानेस्तांची वळख विद्यालयाचे शिक्षक गोविंद तारी हांणी करून दिली.
ह्या वेळार धावेचे परिक्षेंत पास जाल्ल्या गुणेस्त विद्यार्थ्यांचो मानेस्तां हस्तुकीं भोवमान जालो. कार्यावळीचें सुत्रसंचालन शिक्षिका प्रियंका फाळकार आनी संपूर्ण सोलयेंकार हांणी केलें. विद्यालयाचे जेश्ठ शिक्षक अनंतराव राणे हांणी विद्यालयाचो फाटल्या एका वर्साच्या कामाचो आढावो घेतलो. निमाणें तुळशीदास पर्येंकार हांणी सगळ्यांचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
