भांगरभूंय | प्रतिनिधी
देवगड, खबरां संस्था ः फाटल्या कांय दिसांनी अपघाती मरण येवप्यांचो आंकडो वाडला. सिंधुदुर्गांतल्या देवगड तालुक्यांत भिरांकूळ अपघात जाल्ल्याची घडणूक घडल्या. नारिंग्रे-कोटकामते मार्गार मसणभूंये लागसार अचकीत मुखारल्यान येवपी एसटीक वाट दितना रिक्शाचो एसटी धपको लागून रिक्शा चालका सयत चार जाणांक मरण आयलें. जाल्यार एकलो गंभीर जखमी जालो. शुक्रारा दनपारां 3.45 वरांचे सुमाराक हो अपघात जालो.
मेळिल्ले म्हायती प्रमाण, आचरा – मालवण हांगचे रिक्शा वेवसायीक संकेत सदानंद घाडी (२९, आचरा देऊळवाडी), संतोष रामजी गांवकार (३३, आचरा गाऊडवाडी), सुनिल उर्फ सोनू सूर्यकांत कोळंबकार (४८, आचरा पिरावाडी), रोहन मोहन नायक (२९, आचरा गाऊडवाडी) रघुनाथ रामदास बिनसाळे (५०, आचरा भंडारवाडी) हे रिक्शान पर्यटना खातीर देवगडाक गेल्लें.
भोंवडेंतल्यान परतून येतना नारिंग्रे मसणभुंये लागसारच्या एका ओलतार अचकीत मुखारल्यान येवपी एसटीक वाट दितना तिका खर धपको दिलो. हातूंत रिक्शा चालक संकेत घाडी आनी हेर तीग जाणांक आक्ताक मरण आयलें जाल्यार रघुनाथ बिनसाळे गंभीर जखमी जालो. हे सगळे आचराचे रिक्शावाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
