भांगरभूंय | प्रतिनिधी
गुडगांव, खबरां संस्था ः गुरूग्राम पुलिसांनी व्हडले आंतरराष्ट्रीय ड्रग्स रॅकेट उक्ताडार हाडून व्हड येस मेळयलें. सेक्टर-43 गुन्यांव फांट्याच्या पंगडान ड्रग्स तस्करी आड कारवाय करतना सात विदेशी नागरिक मेळून वट्ट आठ आरोपींक अटक केल्या. तांचे कडल्यान सुमार एक कोटी रुपयांचें ड्रग्स जप्त केलां.
चड म्हायती प्रमाण, पोखरा (नेपाळ) हांगा रावपी बिमल पहाडी हाका सेक्टर-39 हांगच्यान पुलिसांनी अटक करून ताचे कडल्यान 1 किलो 60 ग्राम सल्फा आनी 116 ग्राम कोकेन जप्त केलें.
एनडीपीएस कायद्या खाला बिमलाचेर सदर पुलीस स्टेशनांत गुन्यांव नोंद करून ताका चार दीस पुलीस कोठी दिल्या. चवकशे वेळार बिमलान आपल्या हेर वांगड्यांची म्हायती दिली, हाका लागून तस्करीचें व्हडलें जाळें उक्तें जालें.
चड म्हायती प्रमाण, पुलिसांनी दिल्लींतल्यान आनीक सात आरोपींक अटक केली. तातूंत लाल कोठारी (मिझोरम) आनी स नायजेरियन नागरिक उगोचुकवू जॉन उर्फ डेव्हिड, नानजिओफोर पीटर, हेन्री ओनुचुकवू, ओजुक्वा इफेनी, फ्रायडे टोबियास आनी ओकोली रोमनस हांचो आसपाव आसा.
पुलिसांनी दिल्लींतल्यान लाल कोठारी आनी उगोचुकमू जॉन हांकां अटक करून तांची चवकशी सुरु केली. जॉनाची चवकशी करतना ताचेर आदारुन दिल्लीच्या राम कॉलोनींत धाड घालून हेर पांच नायजेरियन आरोपींक अटक केली. तांचे कडल्यान 788 ग्राम कोकेन, 2 किल 34 ग्राम कच्चें कोकेन, तीन इलॅक्ट्रॉनीक स्केल, 42 मोबायल फोन, आठ पॅकिंग पॅकेट्स, सेल टेपीचे स बंडल, नायजेरियन पासपोर्ट आनी 7,500 रुपया रोख जप्त केले. जप्त केल्ल्या वट्ट ड्रग्सांत 1 किलो 60 ग्राम सल्फा, 904 ग्राम कोकेन आनी 2 किलो 34 ग्राम कच्चें कोकेन आसून ताची किंमत सुमार एक कोटी रुपया आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
