भांगरभूंय | प्रतिनिधी
मडगांव पुलिशेंत दुबावितां आड कागाळ
मडगांव: आदले दुस्मानकायेंतल्यान शेजाऱ्यान सुण्याचेर फार पेटोवन मारपाचो यत्न केलो. सद्या ताचेर उपचार सुरू आसात अशी म्हायती बेले नावेलीच्यो वालेंतिना व्हिएरा हांणी मडगांव पुलीस स्टेशनार कागाळ नोंद केल्या. मजगतीं, दक्षीण गोंय प्राणी क्रुरताय प्रतिबंधक समिती कडल्यानूय दुबाविता आड गुन्यांव नोंद करचो अशी कागाळ नोंद केल्या.
बेले नावेले शेजाऱ्यानूच वालेंतिना व्हिएरा हांच्या सुण्याचेर फार पेटावन जिवेशी मारपाचो यत्न केलो. सद्या चार फार लागिल्ल्या सुण्याचेर सोनसड्या वेल्या पशुवैजकी हॉस्पिटलांत उपचार सुरू आसात. वालेंतिना व्हिएरा हांणी मडगांव पुलीस स्टेशनार कागाळ नोंद केल्या. शेजाऱ्या कडेन कांय कारणां खातीर वाद आसत पूण ताचो सुण्या कडेन कसलोच संबंद नाशिल्लो. सुणो तांगेर वचनाशिल्लो वा तांकां घांस मारपा खातिरूय वचूंक नाशिल्लो. अशें आसतना घरा फाटले उक्ते सुवातेंत सुण्याचेर सांजवेळा अॅरगनान फार पेटयले. तातूंतले तीन फार सुण्याच्या पोटाक लागले जाल्यार एक फार तकलेक लागलाे अशी म्हायती व्हिएरा हांच्या कुटुंबान दिली. तांणी शेजाऱ्याचेर गुन्यांव नोंद करून अटक करपाची मागणी केल्या.
मजगतीं, ह्या प्रकरणाची म्हायती दक्षीण गोंय जिल्हो प्राणी क्रुरताय प्रतिबंधक समितीक समजले उपरांत तांणी लेगीत दुबाविता आड गुन्यांव नोंद करचो अशी कागाळ मडगांव पुलिशेंत दाखल केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
