भांगरभूंय | प्रतिनिधी
80 टक्के परस चड गूण मेळयिल्ले 25 विद्यार्थी इत्सूक
पणजी: धावेंत वा बारावेंत उणें गूण मेळिल्ले विद्यार्थी आयटीआयंत प्रवेश घेतात ही मानसीकता आतां बदलची. फाटल्या कांय वर्सांत आयटीआयंत रोजगार दिवपी कोर्स सुरू केल्यात. आयटीआय करून लेगीत बऱ्यो नोकऱ्यो वा स्वताचो वेवसाय सुरू करपाची संद मेळटा. ताका लागून आयटीआय खातीर गुणेस्त विद्यार्थ्यांचो कल वाडला. शिक्षणीक वर्स 2025-26 सात 94.17 टक्के गूण मेळिल्ल्या विद्यार्थ्यांनी अर्ज केल्ल्याची म्हायती कुशळटाय विकास खात्याचे संचालक एस. एस गांवकार हांणी दिली.
अंदूंच्या आयटीआय अभ्यासक्रमां खातीर प्रवेश प्रक्रिया सुरू जाल्या. मेरीट वळेरे प्रमाण धावी पास जाल्ल्या 1460 विद्यार्थ्यांनी आयटीआय अभ्यासक्रमां खातीर अर्ज केला. तातूंत 11 विद्यार्थ्यांक धावेंत 85 टक्क्या परस चड गूण मेळ्ळ्यात. 25 विद्यार्थ्यांक 80 टक्के वा तातूंत अदीक गूण मेळ्ळ्यात. वट्ट उमेदवारां मदीं 12 टक्के विद्यार्थी धावेंत 70 टक्क्या परस चड गूण मेळोवन पास जाल्यात. जाल्यार 60 टक्क्या परस चड गूण मेळयिल्ले 39 टक्के म्हणल्यार 576 विद्यार्थी आसात अशे गांवकार हांणी सांगलें.
काळाची गरज वळखून खात्यान आयटीआय खातीर नवो अभ्यासक्रम सुरू केला. आतां परंपरीक आनी नव्या अभ्यासक्रमाचें शिक्षण दितले. उद्देग मळार लेगीत अभ्यासक्रम केल्ल्या उमेदवारांची मागणी वाडटा. ताका लागून आयटीआय केल्ल्या उमेदवारांक रोजगाराच्यो संदी मेळटात. सद्या लायनमॅन, हॉस्पिटॅलिटी, थ्रिडी प्रिंटिंग अशा अभ्यासक्रमांक बरो प्रतिसाद मेळटा.
खात्यान ताज पंगडा वांगडा केल्ले कबलातीक लागून विद्यार्थ्यांक स म्हयने प्रशिक्षण तशेंच स म्हयने हॉटेलांत काम करपाची संद मेळटा. आयटीआयंत सद्या 42 विशयांचें प्रशिक्षण दितात. तातूंत लायनमॅन, फिटर, वेल्डर, प्लंबर, टर्नर अशा परंपरीक अभ्यासक्रमां सयत ड्रोन टेक्निशियन, मल्टीमिडिया ॲनिमेशन स्पेशल इफेक्ट, फूड अॅण्ड ब्रेव्हरेज सर्व्हीस असिस्टंट, स्मार्टफोन टेक्निशीयन आनी ॲप टेस्टर अग्नी सुरक्षा वेवस्थापन, पर्यटन आनी हॉस्पिटॅलिटी अशा वेगळ्या वेगळ्या अभ्यासक्रमांचो आस्पाव आशिल्ल्याची म्हायती गांवकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
