भांगरभूंय | प्रतिनिधी
मुख्यमंत्र्यांची हमी : आनीक 80 परवाने दिवपाची आस्त
भांगरभूंय । प्रतिनिधी
पेडणें : येरादारी खात्या वतीन शुक्रारा वा सोमारा ब्ल्यू टॅक्सी कावंटर तेच सुवातेर चालू करतले, अशी हमी मुख्यमंत्री डॉ. प्रमोद सावंत हांणी दिल्या, अशी म्हायती ब्ल्यू कॅप टॅक्सी कावंटराच्या शिश्टमंडळान दिल्या. ब्ल्यू कॅप टॅक्सी कावंटर वेवसायिकांनी 18 जूनाक मंत्रालयांत मुख्यमंत्री डॉ. सावंत हांची भेट घेतली. ह्या शिश्टमंडळांत चांदेल हसापूरचे सरपंच तुळशीदास गांवस, टॅक्सी वेवसायीक संघटणेचे अध्यक्ष संजय कांबळी, भांडारी सुवेक गांवस, संयुक्त भांडारी महेश देसाय, राजन नायक, कार्यकारिणी वांगडा राजेश मयेंकार, रुपेश कांबळी हांचो आस्पाव आशिल्लो. शिश्टमंडळान आपल्यो सगळ्यो समस्या मुख्यमंत्र्यां कडेन मांडल्यो आनी न्याय दिवपाची विनवणी केली.
मोपा मनोहर आंतरराष्ट्रीय विमानतळाचेर फाटल्या दोन म्हयन्यां सावन थळाव्या टॅक्सी वेवसायिकांचो आशिल्लो ब्ल्यू कॅप कावंटर कंपनीन सॅक्युरिटी क्लियरन्स करूंक नाशिल्ल्यान बंद केल्लो. ताका लागून हे सगले 200 टॅक्सी वेवसायीक विमानतला भायर एकादें प्रवासी भाडें मेळटा कांय कितें हाची वाट पळयताले. बँकेचे हप्ते तांकां वेळार भरपाक लेगीत मेळनाशिल्ले. अशे स्थितींत टॅक्सी वेवसायीक आशिल्ले. खूब खेपे मुख्यमंत्री, खासदार, आमदार हांची भेट घेवन ब्ल्यू कॅप टॅक्सी वेवसायिकांनी सरकारा मुखार समस्या मांडिल्ल्यो तशेंच कावंटर बेगीन सुरू करपाची मागणी केल्ली. कावंटर बेगीन सुरू केलो ना जाल्यार 26 जून सावन रस्त्याचेर देंवून खर आंदोलन करपाची शिटकावणी तांणी लेखी स्वरुपांत सरकाराक दिल्ली. तुळशीदास गांवस हांणी म्हायती दितना सांगलें, शुक्रारा वा सोमारा टॅक्सी कावंटर कायमस्वरुपी येरादारी खात्या वतीन सुरू करतले, अशी हमी मुख्यमंत्र्यान दिल्ल्यान आपूण समाधान उक्तायतां. ब्ल्यू कॅप टॅक्सी वेवसायिकांक येरादारी खात्यान 200 परवाने दिल्यात. फुडल्या कांय दिसांत अतिरिक्त 80 टॅक्सी वेवसायिकांक परवाने दितले, असोय विस्वास ह्या वेळार गांवस हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
