भांगरभूंय | प्रतिनिधी
म्हापशें वेपारी संघटणेचो निर्णय; पालिकेक चार दिसांची मुजत
भांगरभूंय । प्रतिनिधी
म्हापशें : म्हापशें पालिकेन थापिल्लें जाचक नितळसाण शुल्क (सेनिटेशन फी) तशेंच हेर मागण्यां खातीर सोमारा 23 जूनाक पुराय म्हापशें बाजारपेठ बंद दवरपाचो निर्णय म्हापशें वेपारी संघटणेन घेतला.
बुधवारा 18 जूनाक रातीं उसरां म्हापशें वेपारी संघटणेची बाजारांतल्या फुलांच्या मार्केटांत बसका जाली. ह्या वेळार सुमार 150 वेपारी हजर आशिल्ले. म्हापशें वेपारी संघटणेन म्हापशें पालिका तशेंच नगरविकास खात्या कडेन निवेदन सादर करून चार मागण्यो तांचे मुखार मांडल्यात. मात पालिकेन हे संबंदांत परतून परतून फाटपुरवण करून लेगीत कसलोच निर्णय अजून मेरेन घेवंक ना.
जो नितळसाण कर पांच वर्सांचो लागू केला तो एकाच वर्साचो म्हणल्यार 2025 – 26 वर्सां सावन लागू करचो, वेपाऱ्यांक नितळसाण शुक्लाचो जो श्रेणी दर लागू केला तो योग्य ना, तातूंत फेरबदल करचो, ज्या वेपाऱ्यांनी आतां मेरेन पांच वर्सांचो नितळसाण शुक्ल भरला, तांचें चार वर्सांचे पयशे तत्काळ परत दिवचे आनी वेपार परवान्यांचें वेळार नुतनीकरण जावंक नाशिल्ल्यान लागू जावपी उसरां शुक्ल माफ करचो, अश्यो चार मागण्यो वेपारी संघटणेच्यो आसात.
वेपारी संघटणेचे बसकेंत संघटणेचे अध्यक्ष जितेंद्र फळारी, सरचिटणीस सिद्धेश राऊत आनी आदले अध्यक्ष आशिष शिरोडकार हांणी वयल्या मागण्यां विशीची सविस्तर म्हायती हाजीर आशिल्ल्या वेपाऱ्यांक दिली. पालिका मंडळ आनी पालिका अधिकाऱ्यांनी आमच्या मागण्यां कडेन पुराय आडनदर केल्या, अशें तांणी सांगलें.
नितळसाण शुल्काचें अर्थीक वजें हें बाजारपेठेंतल्या वेपाऱ्यांकूच न्हय जाल्यार शारांतल्या सगळ्या वेपाऱ्यांक तशेंच सर्वसामान्य लोकांक सोंसचें पडटलें. हो नितळसाण कर लागू करपाची प्रक्रियाच मुळांत बेकायदो आसा. पालिका कारभारांत अवैध्यपणां वाडलां. ताचो मार शारांतल्या लोकांक तशेंच वेपारी वर्गाक बसता. हे खातीर ह्या अन्याया आड आतां एकवट दाखोवपाचो वेळ आयला, अशें तांणी सांगलें. फुडल्या चार दिसां भितर आमच्यो मागण्यो पालिकेन मान्य केल्यो नात जाल्यार सोमारा 23 जूनाक बाजार बंद आंदोलन करपाचो निर्णय ह्या वेळार सगल्यांच्या मतान घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
