भांगरभूंय | प्रतिनिधी
मुख्यमंत्री : क्रांतीदिसा निमतान आझाद मैदानाचेर ओंपलीं आर्गां
भांगरभूंय | प्रतिनिधी
पणजी : विकसीत, पाचवेंचार, नितळ गोंयां खातीर क्रांतीची मशाल परतून एक फावट पेटोवची. हें सपन पुराय करपा खातीर सगल्यांनी एकवटान काम करप गरजेचें, अशें मुख्यमंत्री डॉ प्रमोद सावंत हांणी म्हणलें. पणजे आझाद मैदानार क्रांतिदिसा निमतान आयोजीत कार्यावळींत ते उलयताले.
ह्या वेळार राज्यपाल पी. एस. श्रीधरन पिल्लई, मंत्री सुभाष शिरोडकार, मंत्री सुदिन ढवळीकार, विरोधी पक्ष फुडारी युरी आलेमांव, सुटके झुजारी संघटणेचे अध्यक्ष रोहिदास देसाय आनी हेर अधिकारी हजर आशिल्ले. डॉ. राम मनोहर लोहिया हांणी 1946 त गोंयांत क्रांतीची वात पेटयली. भारत स्वतंत्र जाले उपरांत गोंय मुक्त जावपाक 14 वर्सां लागलीं. हीं 14 वर्सां गोंयची उदरगत जावपा पसून फाटींच उरिल्लें. मात डबल इंजीन सरकाराक लागून फाटलीं स वर्सां गोंयांत दोळे दिपकावपी उदरगतीचीं कामां जाल्यांत. आयज गोंय मुळाव्यो सुविधा, उदरगतीच्या कामांत देशांत मुखार आसा. एका अर्थान डॉ. लोहिया वा स्वातंत्र्य सैनिकांनी गोंयां खातीर पळयिल्लीं सपनां आतां पुराय जातात, अशें मुख्यमंत्र्यान म्हणलें.
सरकारान मुळावी उदरगत केल्या. आतां आमकां मुखार उदरगत करपाची आसा. केंद्र सरकाराचे 13 फ्लॅगशीप प्रकल्प पुराय करपाकूय गोंय देशांत मुखार आसा. गोंयांत गुन्यांवांचो तपास पुराय करपाचेय टक्के बरे आसात. कायदो पाळप ही सगल्या नागरिकांची जापसालदारकी. प्रधानमंत्री नरेंद्र मोदी हांणी विकसीत भारत 2047 चें लक्ष्य दवरलां. आमकां ताचे पयलीं धा वर्सां म्हणल्यार 2037 त हें ध्येय पुराय करपाचें आसा. विकसीत गोंय 2037 खातीर जात, धर्म, राजकीय मतभेद विसरून एकठांय येवप गरजेचें, अशेंय तांणी मुखार म्हणलें.
इतिहास खबर आसप गरजेचें : डॉ. सावंत
आमचो इतिहास खबर आसल्यारूच वर्तमान आनी फुडार पर्जळटा. हे खातीर तरणाटे पिळगेक गोंयचो इतिहास खबर आसप गरजेचें. राज्य सरकारान गोंयच्या मुक्ती संग्राम विशीं एनिमेशन चित्रपट केला. हो चित्रपट 19 डिसेंबराक प्रदर्शीत करतले, अशें मुख्यमंत्री डॉ. सावंत हांणी सांगलें.
‘डॉ. लोहिया हांचीं पुस्तकां उपलब्ध करतले’गोंयांतले
तरणाटे पिळगेक राम मनोहर लोहिया, दीनदयाळ उपाध्याय हांचो इतिहास खबर आसप गरजेचें. गोंयांतल्या कांय वाचनालयांनी राम मनोहर लोहिया हांचीं पुस्तकां नात. आमी बेगिनूच हीं पुस्तकां विकत घेवन वाचनालया खातीर उपलब्ध करून दितले, अशें राज्यपाल पिल्लई हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
