भांगरभूंय | प्रतिनिधी
म्हापशेंः सुकूर इगर्जे लागसार घडिल्ल्या जीवघेण्या हल्ल्याचें प्रकरण कागाळदार आनी दुबावितान आपापले मदीं मिटयल्ल्यान म्हापशेंच्या उत्तर गोंय अतिरीक्त सत्र न्यायालयान चारूय दुबावितांक निर्दोश सोडले.
न्यायाधीश राम सुब्राय प्रभू देसाय हांणी आरोपी मयुर उर्फ लक्ष्मण आर्लेकार (रा. पैठण), कृष्णा सावळो नायक (रा. आल्तो तोर्डा), राहुल रमेश आर्लेकार (रा. पैठण) आनी प्रणम विनय नायक (रा. आल्तो पर्वरी) हांकां दोशमुक्त सुटका करपाचो निवाडो दिलो.
न्यायालयांत सुनावणे वेळार फिर्यादींनीं साक्ष दितना सांगलें, आमी स्वताच आरोपी वांगडा प्रकरण मिटयलें आनी आरोपीं आड ह्या प्रकरणांत कांयच उलोवपाची इत्सा ना. हाका लागून आमचेर आरोपींनी धमकी, जबरदस्ती वा चेंपण हाडूंक ना.
दोनूय पक्षांनी आपापले भितर हें प्रकरण शांतिकायेन मिटयिल्ल्यान ह्या खटल्यांत न्यायालयान निर्णय घेवपा खातीर कांय उरूंक ना, अशें निरीक्षण निवाड्यांत न्यायालयान नोंद केलें.
न्यायालयांत सरकारी पक्षा वतीन सरकारी वकील पी. नारूलकार हांणी, जाल्यार दुबावितां वतीन ऍड. ए. शिरोडकार आनी ऍड. ए. खोब्रेकर हांणी युक्तीवाद केलो.
मजगतीं, हें प्रकरण ता. २१ मार्च २०१९ दिसा दनपरां सुमार ३.३० वरांचेर सुकूर चर्च जंक्शना लागसार घडिल्लें. कागाळदार जगल वझरकर हांचे सयत ताचो इश्ट विलास पाटील, महादेव पाटील, राम लखन आनी विजय गायकवाड ह्या पांच जाणांचेर हल्लो करीत तांकां दुबावीत मयुर उर्फ लक्ष्मण आर्लेकार, कृष्णा सावळो नायक, राहुल रमेश आर्लेकार आनी प्रणम विनय नायक ह्या चौगांनी सुरयेन हल्लो करून जखमी केल्लें.
पर्वरी पुलिसांनी ह्या प्रकरणांत भा.दं.सं.च्या ३०७, ३२२, ३२४, ३२५, ३४ आनी बंदूक कायदो कलम ३ (२५) अन्वये गुन्यांव दाखल करीत दुबावितांक अटक केल्ली. ह्या प्रकरणाचो तपास तेन्नाचे पुलीस उपनिरीक्षक चंद्रकांत गांवस आनी तेन्नाचे उपनिरीक्षक निखील पालेकार हांणी करून न्यायालयांत आरोपपत्र सादर केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
