भांगरभूंय | प्रतिनिधी
पणजी : ओपा जलशुद्धीकरण प्रकल्पा कडेन जोडिल्ली मुखेल पायप लायन सोमारा फुटिल्ल्यान पणजी आनी भोंवतणच्या गांवांनी उदकाची पुरवण बंद जाल्या. ह्या प्रकल्पाक लागून राज्यांतल्या आटून गेल्ल्या उदकाच्या पायपांनी परत एक फावट लक्ष ओडून घेतलां.
मजगतीं, पायपलायन फुटिल्ल्याची म्हायती हातांत येतांच, भौशीक बांदकाम विभागाचे कर्मचारी बेगोबेग घडणुके सुवातेर आयल्यात आनी दुरुस्तीचें काम सुरू केलां. कांय वाठारांत २४ वरांनी उदकाची पुरवण सुरळीत जाल्या. मात हातूंत नेट आनी नेमान प्रवाह जावपाक आनीक एक-दोन दीस लागपाक शकता, अशें अधिकार्यांनी सांगलें.
दोन म्हयन्यांनी तिसरी व्हड घडणूक
फाटल्या दोन म्हयन्यांनी ही तिसरे फावट व्हड पायपलायन फुटपाची घडणूक. फाटल्या सप्तकांत हणजूण गांवांत १००० मिमी व्यासाची पायपलायन फुटली. उपरांत ग्रामस्थांक पांच दीस उदका बगर रावचें पडिल्लें. जाल्यार एप्रिलांत सत्तरी म्हालांतल्या खुबश्या गांवांनी उदक नाशिल्लें. राज्यांतल्यो खुबश्यो पायपलायनी पोरण्यो, कळमेल्ल्यो आनी ताण सोंसपाक असमर्थ आसात. कांय पायपां स्वातंत्र्या आदल्या काळाच्यो आशिल्लयन त्यो वापरपाची काळ मर्यादा सोंपल्या. उणें बजेट आनी चड काळाच्या नियोजनाच्या उणावाक लागून जायते फावटीं तात्पुरत्या कामानूच सामाधान मानचें पडटा.
राज्य सरकारा कडल्यान दर वर्सा उदकाची पुरवण सुदारपा खातीर येवण आनी प्रकल्प जाहीर करतात. मात, प्रत्यक्षांत चडसो कांयच बदल जावंक़ ना, अशी टिका जनता करता. मजगतीं पीडब्ल्यूडीचे वरिश्ठ अभियंत्यांनी दिल्ले म्हायती प्रमाण, खात्याचे क्षेत्रीय पंगड सतर्क आसा आनी खंयच्याय प्रसंगा वेळार रोखडेच प्रतिसाद दिवपाक तयार आसात. मात, कायमच्या समाधाना खातीर पोरणे यंत्रणेची व्हडा प्रमाणांत परत रचणूक करप गरजेचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
