भांगरभूंय | प्रतिनिधी
मुख्यमंत्री : चित्रपट धाडपाची निमाणी मुजत 7 जुलय
भांगरभूंय । प्रतिनिधी
पणजी : पणजेच्या ईएसजी संकूल वाठारांत गोवा चित्रपट महोत्सव 14 ते 17 ऑगस्ट मेरेन जातलो. अंदूं महोत्सवाची 10 वी, 11 वी आनी 12 वी आवृत्ती एकठांय घेतले. महोत्सवाक चित्रपट धाडपाची निमाणी मुजत 7 जुलय मेरेन आसा, अशी म्हायती मुख्यमंत्री डॉ. प्रमोद सावंत हांणी दिली. सोमारा पणजे घेतिल्ले पत्रकार परिशदेंत ते उलयताले. ह्या वेळार आमदार डिलायला लोबो, मुख्य कार्यकारी अधिकारी अश्वीन चंद्रू हाजीर आशिल्ले.
मुख्यमंत्र्यान सांगलें, ह्या तीन आवृत्त्यां खातीर चित्रपट 1 जानेवारी 2018 ते 31 डिसेंबर 2023 ह्या काळांत निर्मीत केल्लो आसपाक जाय. फिचर विभागांत कोंकणी आनी मराठी विभाग आसतले. नॉन फिचर विभागांत कोंकणी आनी मराठी चित्रपट एकठांय दाखयतले. फिचर चित्रपट उण्यांत उणो 70 मिण्टां जाल्यार नॉन फिचर उण्यांत उणो 50 मिण्टां आसप गरजेचें आसा. चित्रपटांत मुख्य भुमिका करपी उण्यांत उणे 15 टक्के गोंयकार कलाकार आपस गरजेचें आसा.
सर्वोत्कृश्ट चित्रपटा खातीर पयलें इनाम 5 लाख रुपया जाल्यार दुसरें 3 लाख रुपया आसतलें. सर्वोत्कृश्ट दिग्दर्शना कातीर पयलें इनाम 50 हजार रुपया जाल्यार दुसरें 35 हजार रुपया आतसलें. हेर 19 विभागां खातीर दरेकी 25 हजार रुपयांचीं इनामां आसतलीं. डॉन फिचर विभागांत सर्वोत्कृश्ट चित्रपटाक एक लाख रुपयाचें इनाम आसतलें. महोत्सवांत अंदीं पयलेच खेपे शॉर्ट फिल्म मेकींग सर्त आयोजीत केल्या. तातूंत स्पर्धकांक 48 वरां भितर शॉर्ट फिल्म तयार करची पडटली, अशें मुख्यमंत्र्यान स्पश्ट केलें. महोत्सवांत चित्रपटा भायर मास्टर क्लास कार्यशाळा, इन कॉन्व्हर्सेशन अशीं विवीध सत्रां आसतलीं. महोत्सवा विशीं अदीक म्हायती आनी नेम ईएसजीच्या संकेतथळाचेर उपलब्ध आसा. महोत्सवांत चित्रपट धाडचे कातीर 17 जून ते 7 जुलय मेरेन मुजत दवरल्या. सर्वसामान्यां कातीर महोत्सव फुकट आसा. ते खातीर नांव नोंदणी करची पडटली. गोंय तशेंच देशभरांतले चित्रपट रसिकांनी ह्या महोत्सवाचो लाव घेवचो, असो उलो मुख्यमंत्र्यान मारला.
चित्रपट अनुदान येवजण
गोंय सरकाराच्या चित्रपट अनुदान येवजणे खाला 2016 ते 2023 मेरेन 30 अर्ज मंजूर केल्यात. जांणी येवजणेचो लाव घेवंक ना, तांचे खातीर 18 ते 25 जून मेरेन मुजत दिल्या. अर्ज आयले उपरांत तांची छाननी जावन मजत दितले, अशें डिलायला लोबो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
