भांगरभूंय | प्रतिनिधी
आगरवाडो : कुटुंबीक वादांतल्यान २५ वर्सां पिरायेच्या तरणाट्यान आपले आवयचेर कोयत्यान हल्लो केल्ल्याची घडणूक आयतारा १५ जुनाक आगरवाडो, पेडण्यां घडली. सुषमा कळंगूटकार (५०) हे बायलेन दिल्ले कागाळीवेल्यान पुलिसांनी तिचो पूत चंद्रशेखर चंद्रकांत पाटील उर्फ संजू (२५) हाका अटक केली.
कागाळी प्रमाण, दनपरां ३ ते ६ वरां मजगती घरांतूच वाद जाला. संजून तिडकीन आपले आवयक वायट उतरां दीत जिवी मारपाची धमकी दिली आनी तिचे तकलेर, मानेर, छातयेर आनी हेर भागांचेर कोयत्यान वार केले. हाका लागून ती गंभीर जखमी जाली. तिचेर सध्या गोमॅकॉंत उपचार सुरू आसात.
ह्या प्रकरणांत मांद्रें पुलिसांनी संजू आड भारतीय न्याय संहितेच्या कलम ३५२, ३५१(३) आनी १०९ खाला गुन्यांव नोंद केला. पुलिसांनी कायदेशीर गजाली सगल्यो केले उपरांत सोमारा सकाळीं ताका अटक केली. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
