भांगरभूंय | प्रतिनिधी
पणजीः फुकट उदक दिवपाचे येवजणेचो कांय जाणांनी गैर फायदो घेवन चार- चार मिटर लायले. उदकाची व्हडा प्रमाणांत नासाडी जाल्ल्यान ही येवजण बंद केली. सरकार दर क्युबीक मिटर उदका फाटल्यान २० रुपया खर्च करून प्रक्रिया केल्ल्या उदकाची पुरवण करता आनी गोंयकारां कडल्यान फकत ४ रुपया घेता, अशें मुख्यमंत्री डॉ. प्रमोद सावंत हांणी सांगलें.
डॉ. सावंत हस्तुकीं २१ कोटी खर्चून आगशे उदका पुरवणेची सुविधा आनी नावशी उदकाचे टाकयेचें उक्तावण जालें. आगशेच्या इगर्जेच्या सालांत जाल्ल्या सुवाळ्यांत थळावे आमदार विरेश बोरकार, पियेवपाचे उदकाच्या खात्याचे मुखेली सुहास बेळगांवकार आनी हेर अधिकारी हजर आसले.
ह्या वेळार उलयतना मुख्यमंत्र्यान सांगलें, नळाच्या उदकाची ४० टक्के नाशाडी जाता आनी ती २० टक्क्यांचेर हाडपाचो आमचो यत्न चल्ला.
फुकट उदक दिवपाक सुरवात केल्ली तेन्ना ४-४ मिटर लावन ताचो दुरूपेग करतना नदरेक आयलें. उदक ही गरज भागोवपा खातीर आसा. ताचो वापर गाडी धुंवपाक वा झाडांक घालपा खातीरच करचो न्हय. पूण ह्या उदकाची गरजे भायर नासाडी जावपाक लागली म्हण ही येवजण बंद उडयली, अशें मुख्यमंत्र्यान सांगलें.
सरकार दर क्युबीक मिटर उदका फाटल्यान रु. १६ इतलें लुकसाण सोंसून गोंयकारांक उदकाची पुरवण करता. धरणांतल्यान कच्चें उदक हाडून ताचेर प्रक्रीया करून त्या उदकाची नळांत पुरवण करपा खातीर सरकार दर क्युबीक मिटरा फाटल्यान रु. २० खर्च करता. मात ह्या उदका फाटल्यान सरकार गोंयकारां कडल्यान फकत रु. ४ घेता, अशी म्हायती मुख्यमंत्र्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
