काणकोण : उदका पुरवण विभागाचो नळ चालूच उरलो आनी…
भांगरभूंय | प्रतिनिधी
काणकोण: काणकोण मामलेदार संकुलाचे इमारतींत दुसरे माळयेर उदका पुरवण विभाग, जाल्यार सकयले माळयेर विभागीय शेतकी कार्यालय आसा. उदका पुरवण विभागाच्या कार्यालयांत शेनवारा सुटयेच्या दिसा नळ चालूच उरिल्ल्यान पुराय उदका पुरवण खात्यांत उदकूच उदक जालें. उपरांत तेंच उदक सकयले वटेन आशिल्ल्या शेतकी कार्यालयांत भितर सरलें. हाका लागून शेतकी कार्यालयांतले लॅपटॉप, प्रिंटर तशेंच कृषी कार्डा खातीर शेतकारांनी दिल्लीं कागदपत्रां आनी हेर फायली भिजल्यो. हे विशीं शेतकी अधिकारी महेंद्र पागी हांची भेट घेतली तेन्ना तांणी लुकसाणे विशीं सांगलें.
हरशीं उदक मेळना आनी उदका पुरवण विभाग बरे तरेन उदकाची पुरवण करिना, अश्यो कागाळी आसतात. मात उदका पुरवण विभागाच्या कचेरेंतल्यानूच हेर कार्यालयांनी उदक भिततर सरिल्ल्यान आयज खर्या अर्थान उदका पुरवण विभागाच्या कार्यालयाचे सार्थक जाल्ल्याची चर्चा नागरिकां मदीं चलिल्ली आयकूंक मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
