भांगरभूंय | प्रतिनिधी
नवी दिल्ली, खबरां संस्था: ऑपरेशन सिंदूर उपरांत कांय सप्तकां उपरांत हवाई दळाच्या ताफ्यांत एक नव्या विमानाचो आसपाव जातलो. ह्या म्हयन्याचे निमाणे कडेन हवाई दळाक स्वदेशी बनावटीचें तेजस झुजाचें विमान तेजस Mk 1A हें फुडले पिळगेचें विमान मेळटलें. उड्डाण चाचण्यांची निमाणी प्रक्रिया पुराय जाले उपरांत हें झुजाच्या विमानाचो आसपाव ताफ्यांत जातलो.
फेब्रुवारी २०२१ वर्सा, हिंदुस्तान एरोनॉटिक्स लिमिटेड (HAL) वांगडा ८३ तेजस Mk 1A विमानां खातीर ४८ हजार कोटी रुपयांचो करार केलो. तांची डिलिव्हरी मार्च २०२४ त जावपाची आशिल्ली. मात अमेरिकन कंपनी जनरल इलेक्ट्रिक (GE) कडल्यान इंजिन F404 IN20 ची पुरवण करपाक कळाव जाल्ल्यान डिलिव्हरीक सुमार देड वर्साचो कळाव जालो.
एचएएलच्या सुत्रां प्रमाण, अंदूंच्या मार्च म्हयन्या सावन नवें इंजिन येवपाक सुरवात जाल्या. ह्या वर्साचे निमाणे कडेन १२ तेजस एमके 1E विमानां हवाई दळाक दितले.
मिग- २१, मिग- २७ आनी जॅग्वार हांचे सुवातेर तेजस येतलो मेक इन इंडिया आनी आत्मनिर्भर भारताच्या खर हेतान सरकारान एचएएल कडेन वट्ट १८० तेज Mk 1A खातीर करार केला. पयल्या गटांत ८३ विमानांचो आस्पाव, जाल्यार दुसर्या गटांत ६७ हजार कोटी रुपया खर्च करपी ९७ विमानांचो आस्पाव आसा.
हवाई दळांतल्या टप्प्याटप्प्यातल्यान काडून उडोवपी मिग-२१, मिग-२७ आनी जॅगॉर विमानांची सुवात तेजस घेतलें. हवाई दळाच्या ताफ्यांत ४२ विमानां आसपाक जाय आशिल्लीं, आतां तीं ३० मेरेन उणीं केल्यांत. एक दशकांत तेजस Mk 1, Mk 1A, Mk 2 हांचो ३५० वयर जेट विमानां हवाई दळांत आसपाव जातलो. पयलें तेजस एमके २ २०२८-२९ वर्सा मेळूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
