भांगरभूंय | प्रतिनिधी
जोयडा : बेळगाव-चोर्ला मार्गावेल्या कुसमळी गांवांत मलप्रभा न्हंयेचेर बांदिल्लो तात्पुरतो पूल शेनवारा रातीं पावसाच्या नेटान व्हांवून गेलो. हाका लागून ह्या मार्गावेली येरादारी बंद केल्या. गोंयांत येवपी वाहनां आतां जांबोटी -खानापूर मार्गान वळयल्यांत.
हांगा नव्या पुलाचें काम सुरू आशिल्ल्यान तो पुराय जाय मेरेन तात्पुरतो मातयेचो पूल बांदिल्लो. मात, पावसाक लागून न्हंयेची पातळी नेटान वाडिल्ल्यान ह्या पुलाच्या एके वटेनची पुराय माती व्हावून गेली, जाल्यार दुसरे वटेन माती खचून बरोच व्हड खड्डो पडलो. थळाव्या प्रशासनान ह्यान पयलींच कंत्राटदाराक मान्सूनपूर्व काळांत पुलाचें बांदकाम पुराय करपाची सुचोवणी दिल्ली. मात जुनांत मान्सून सुरू जावन लेगीत पुलाचें काम पुराय जावंकूच ना. हो पर्यायी पुलूय आतां निश्क्रीय जाल्ल्यान, आतां पावसांत तो सारको करप सामकें कठीण काम आसा. हाचो परिणाम, मुखेल पूल पुराय जायसर कुसमळी मार्गावेली येरादारी बंद दवरले.
हे घडणुकेक लागून थळावे आनी गोंयांत येवपी वेपारी आनी वाहन चालकांक व्हड आडखळ निर्माण जाल्या. आतां पर्यायी मार्गार वाडिल्ली येरादारी आनी बरोच व्हड रावंड मारचो पडिल्ल्यान प्रवासांत बरेच त्रास सोंसचे पडटले. प्रशासनान बेगोबेग नव्या पुलाचें काम पुराय करून मार्ग सुरळीत करपाची मागणी लोक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
