भांगरभूंय | प्रतिनिधी
8 पर्यटन थळां करतले उक्ती : उपराज्यपाल
जम्मूचे आयुक्त, म्हानिरिक्षकांनी घेतला अहवाल
दुसऱ्या पांवड्यार हेर वाठार जातले उक्ते
खबरां संस्था
श्रीनगर : 22 एप्रीलाक पहलगाम हल्ल्या उपरांत सुरक्षेच्या कारणा खातीर पर्यटन थळां बंद केल्लीं. पर्यटकां खातीर तीं परतून येवजणबद्द पद्दतीन उक्तीं करतले, अशें शेनवारा जम्मू-काश्मीराचे उपराज्यपाल मनोज सिन्हा हांणी सांगलें.
उपराज्यपाल सिन्हा दक्षीण काश्मीराच्या अनंतनाग जिल्ह्याच्या पहलगामांत वर्सुकी अमरनाथ यात्रेच्या नुनवान आदार शिबिराची भोंवडी केले उपरांत पत्रकारां कडेन उलयताले.
सुरक्षेच्या कारणां खातीर 22 एप्रीला उपरांत कांय वाठार बंद केल्ले. काश्मीर आनी जम्मूच्या विभागीय आयुक्तांनी आनी पुलीस म्हानिरिक्षकांनी दर जिल्ह्यां कडल्यान अहवाल घेतला आनी येवजणबद्द पद्दतीन कांय पर्यटन थळां उक्तीं करपाचो निर्णय घेतला, अशें उपराज्यपालान म्हणलां.
सिन्हा हांणी सांगलें पयल्या पांवड्यार जीं थळां पर्यटकां खातीर परतून उक्तीं करपाचो निर्णय घेतला, तातूंत पहलगामाचें फामाद पर्यटन थळ बेताब घाटी आनी पहलगाम बाजारा लागसारचो पार्क, अनंतनाग जिल्ह्यांतलें वेरीनाग, कोकरनाग आनी अचबल बागेचो आस्पाव आसा. श्रीनगरांत बादमवारी पार्क, निगीन लागसारचें डक पार्क आनी हजरतबल लागसारचें तकदीर पार्क लेगीत पयल्या पांवड्यार उक्तें करतले.
उपराज्यपाल सिन्हा हांणी सांगलें, हीं 8 पर्यटन थळां परतून उक्तीं करतले आनी पर्यटक ह्या थळांचेर वचपाक शकतले. जम्मूंतलीं लेगीत 8 थळां उक्तीं करतले. पयल्या पांवड्यार 8 जाल्यार दुसऱ्या पांवड्यार हेर कांय पर्यटन थळां पर्यटकां खातीर परतून उक्तीं करतले, अशें उपराज्यपाल सिन्हा हांणी सांगलें.
अमरनाथ यात्रे निमतान देश – विदेशांतल्यान व्हड संख्येन भाविकांनी येवचें. भाविकांनी येतना सुरक्षा दळाचे देखरेखी खाला येवपी पंगडांतल्यान येवचें, अशें सिन्हा हांणी मागलां. विवीध समाजीत, वेपारीक आनी राजकी संघटणांनी जम्मू- काश्मीरांतले पार्क परतून सुरू करपाची मागणी लावन धरिल्ली. प्रदेश प्रशासनान हे पार्क उक्ते करचे खातीर एक समिती लेगीत घडयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
