भांगरभूंय | प्रतिनिधी
पणजी : गोंय पर्यटन उदरगत म्हामंडळा वतीन बागांत अॅक्वारियम पार्काचो प्रस्ताव मांडला. हे विशीं म्हामंडळान आरएफक्यू स्वरुपाची निविदा जारी केल्या. अॅक्वारियम म्हामंडळाच्या बागांतली 2,975 चौखण मिटर जमनीर बांदतले. हे विशींची परवानगी मेळपी कंपनीक अॅक्वारियम पार्क विकसीत करप, चलोवप तशेंच देखभालीचें काम करचें पडटलें. अॅक्वारियमांत उण्यांत उणे 30 जलचर प्राणी आसप गरजेचें आसा.
हे संबंदांत काडिल्ल्या प्रस्तावांत म्हणलां, गोंय संवसारीक पांवड्या वयलें पर्यटन थळ आसा. गोंयांत दर्यादेगो, साहसी पर्यटन उपक्रम, धर्मीक थळां, किल्ले, रानवटी जीव आनी पक्षी अभयारण्यां, युनेस्को संवसारीक दायज थळां अशीं विवीध पर्यटन थळां आसात. गोंयांतल्या पर्यटनाक चालना दिवचे खातीर अॅक्वारियम पार्काचो प्रस्ताव तयार केला. तातूंत पार्का वांगडाच पर्यटना कडेन संबंदीत हेर उपक्रम चालीक लायतले. तशेंच मल्टी क्युझीन रेस्टॉरंण्ट आनी पार्किंगाची सुविदा लेगीत उपलब्ध करून दितले. पार्काचें वेवस्थापन करचे खातीर घेतले ते 80 टक्के कर्मचारी हे थळावे आसप गरजेचें आसा. ह्या वाठारांत सीसीटीव्ही कॅमेरा लावप, नितळसाण दवरप, पर्यटकांची सुरक्षा सांबाळप हीं कामां बोली जिखपी कंपनीक करचीं पडटलीं. थंयचें कोयर वेवस्थापन गोंय प्रदुशण नियंत्रण मंडळाच्या नेमां प्रमाण करचें पडटलें. पार्क बांदप आनी ताचें वेवस्थापन करपा खातीर गरजेचे सगळे परवाने कंपनीक घेवचे पडटले. ह्या वाठारांत वेवसायीक, ठोक आनी डिपार्टमेंटल दुकानां बांदपाक मेकळीक दिल्या.
कॅसिनोक चालना दिवपाक परवानगी ना
अॅक्वारियम पार्क प्रकल्प वाठारांत कॅसिनो, जुगार, असभ्य नाच, अयोग्य गुंतवणूक सल्ले, राजकी कॅम्पेन, घुंवळी वखदांक चालना मेळटली अश्या कसल्याच उपक्रमांक परवानगी दिवचे ना. अश्या उपक्रमांची जायरात केल्यार म्हामंडळ करार रद्द करतले, अशें म्हामंडळाच्या प्रस्तावांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
