भांगरभूंय | प्रतिनिधी
मडगांव ः नव्या मार्केट इमारती विशीं मुख्यमंत्री डॉ. प्रमोद सावंत हांचे वांगडा 17 जून दिसा बसका जातली. त्या वेळार जीएसआयडीसीचे अधिकारी, कंत्राटदार आनी हेर संबंदीत खात्याचे अधिकारी हाजीर आसतले. ह्या वेळार मार्केटच्या समस्यांचेर चर्चा जातली आनी उक्तावणाची तारीख थारायतले अशी म्हायती एसजीपीडीएचे अध्यक्ष दाजी साळकार हांणी दिली. हाचे भायर मार्केटांत नितळसाण करपा खातीर काम सुरू जालां अशेंय तांणी स्पश्ट केलें.
एसजीपीडीए मार्केटांतल्या अस्वच्छ आनी चिखलाच्या वाठारांचो प्रस्न उप्रासला. हाचे उपरांत शेनवारा दनपारां अध्यक्ष दाजी साळकार हांणी एसजीपीडीएच्या घाऊक मुस्तें मार्केटाक भेट दिवन ताची पळोवणी केली. तशेंच वाठार सपाटीकरणाचे काम सुरू केला.
एसजीपीडीएच्या घाउक नुस्तें मार्केटांतल्या नव्या इमारतीचें काम पुराय जालां. वीज प्रस्नय सुटावो जाला. हांगाच्या देखरेख करपाक कोणाक तरी दितले. सोपो कर वसुल करपा खातीर कंत्राटदार नेमपा खातीर निविदा प्रक्रिया सुरू आसा. जूनाच्या निमाणे मेरेन ही निविदा काडटले. हे विशीं मुख्यमंत्र्या कडेन जावपी बसकेंत चर्चा जातली अशें साळकार हांणी सांगलें.
किरकोळ नुस्तें मार्केट नूतनीकरणाचो विचार
एसजीपीडीएच्या किरकोळ नुस्तें मार्केट नूतनीकरणाचो प्रस्ताव तयार केला. गरजेचीं कामां थंय जातली. पूण थंयच्या विक्रेत्यांनी दिल्ल्या धा रुपयाच्या सोपो करान हें सगळें करप शक्य ना. तातूंत वाड करची पडटली. हाचे भायर बाजारांतल्या कोयराक डस्टबिन उपलब्ध करून लेगीत कोयर भायर उडयतात. एसजीपीडीए सगळेंच करपाक शकना, ते खातीर लोकांच्या सहकार्याची गरज आसा. फकत एसजीपीडीएक दोश दिवप योग्य जायना ना अशें दाजी साळकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
