भांगरभूंय | प्रतिनिधी
नवी दिल्ली, खबरां संस्था ः डीजीसीएन एअर इंडियाच्या बोईंग 787 ड्रीमलायनर विमानाची सुरक्षेची तपासणी करपाचो आदेश शुक्रारा दिलो. 12 जून दिसा अहमदाबादांत जाल्ले विमान अपघाताच्या एका दिसा उपरांत हो आदेश जारी केलो. बोईंगच्या 787-8 आनी 787-9 विमानांची दरेक उड्डाणा पयलीं तपासणी करतले. आनी सगळे अहवाल डीजीसीएक सादर करतले अशें आदेशांत म्हणला.
जेनएक्स इंजिन आशिल्ल्या बोईंग 787-8 आनी 787-9 विमानांची अतिरिक्त देखरेख करपाचो निर्देश डीजीसीएन एअर इंडियाक दिला. हो आदेश आयतार, 15 जून सावन लागू जातलो. टाटा गटाच्या एअर इंडियाच्या विमानांत 26 बोईंग 787-8 आनी 7 बोईंग 787-9 विमानां आसात.
दरेक उड्डाणा पयलीं ह्यो चांचण्यो गरजेच्यो…
० इंधन प्रणाली तपासप म्हणल्यार इंधन संबंदीत पॅरामीटर्स बरोबर आसात काय ना तें तपासप.
० कॅबिन एअर सप्लाय सिस्टम तपासप.
० इंजिन नियंत्रण प्रणाली तपासप.
० इंजिनाचें इंधन आनी तेल प्रणाली तपासप.
० विमानाचीं चाकां आनी ब्रेक नियंत्रीत करपी हायड्रॉलिक प्रणाली तपासप.
० गती, वजन अशा टेक-ऑफ डेटाचो नियाळ घेवप.
० दर एका थांब्यार नवी उड्डाण नियंत्रण तपासणी करतले.
० फुडल्या 2 सप्तकांत पॉवर टेस्ट (इंजिन स्ट्रेंथ चेक) करप सक्तीची आसा.
० फाटल्या 15 दिसांत ह्या विमानांनी परत परत जाल्ल्या अपयेसांची पुराय चवकशी जाय मेरेन कसलीच देखरेख बंद करचे नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
